संविधानको रक्षा एवं संसदीय गरिमाको सम्बर्द्धनको पक्षमा सर्वोच्चको फैसला: बानियाँ

२८ असार, हेटौंडा । नेपाली कांग्रेस बागमती प्रदेश संसदीय दलका नेता एवं मकवानपुर सभापति इन्द्रबहादुर बानियाँले सर्वोच्च अदालतले सोमबार गरेको फैसलाको स्वागत गरेका छन् । 
अदालतले राष्ट्रपतिबाट भएका सबै निर्णय बदर गर्दै साउन ३ गतेभित्र संसद बैठक बोलाउन तथा दुई दिन भित्र नेपाली कांग्रेस संसदीय दलका नेता शेरबहादुर देउवालाई प्रधानमन्त्रीमा नियुक्त गर्न दिएको आदेशको नेता बानियाँले सम्मान व्यक्त गर्दै स्वागत गरेका हुन् ।
संचारकर्मीहरूलाई प्रतिक्रिया दिंदै उनले अदालतले संसदीय मूल्यमान्यतालाई स्थापित गरिदिएको बताए । उनले प्रधानमन्त्रीको सनक र राष्ट्रपतिको बहकाउमा संसद विघटन गर्न नमिल्ने स्पष्ट पारेको उल्लेख गर्दै संविधानको रक्षा एवं संसदीय गरिमाको सम्बर्द्धनकाे पक्षमा स्वतन्त्र न्यायपालिकाले स्पष्ट फैसला दिएको बताए । 
सर्वोच्चका 'न्यायमूर्तिहरू'को अहिलेको फैसलाले संविधानको रक्षा गर्दै संघीय लोकतान्त्रिक गणतन्त्रलाई मजबुत बनाउने काम भएको उनको भनाइ छ । कुनै पनि राजनैतिक व्यक्तित्वले लोकतन्त्र कमजोर पार्न खोजे स्वतन्त्र न्यायपालिका रहेसम्म त्यो सफल नहुने कुराको अहिलेको फैसला प्रमाण भएको बताए । उनले नेपाली कांग्रेसको काँधमा युगिन जिम्मेवारी आएको भन्दै पार्टीका सबै तह र तप्काका नेता कार्यकर्ता सधैं झैं जिम्मेवार र मर्यादित भई जनताको सेवामा जुट्दै संघीय लोकतान्त्रिक गणतन्त्रलाई मजबुत बनाउने काममा निरन्तर खटिनुपर्नेमा जोड दिए ।
सर्वोच्चको फैसला अनुसार नेपाली कांग्रेसका सभापति देउवा मंगलबार प्रधानमन्त्री बन्ने छन् । उनले त्यसको ३० दिन भित्र संविधानको धारा ७६ (६) अनुसार विश्वासको मत लिनु पर्ने छ ।
विश्वासको मत प्राप्त गरेमा देउवा नेतृत्वको सरकारले डेढ वर्ष सत्ता सञ्चालन गर्ने छ । विश्वासको मत प्राप्त नगरेको अवस्थामा संविधानको धारा ७६ (७) अनुसार प्रतिनिधिसभा विघटनको सिफारिस गरी चुनाव गराउने जिम्मेवारी प्राप्त गर्ने छ । देउवालाई विश्वासको मतका लागि १३६ सांसदको समर्थन चाहिन्छ ।