बागमती प्रदेशका सभामुखको भूमिकाबारे संसदमा उठ्यो प्रश्न

२८ असार, हेटौंडा । बागमती प्रदेशका सभामुख सानुकुमार श्रेष्ठको भूमिकामाथि सोमबारको प्रदेशसभा बैठकमा सांसदहरुले प्रश्न उठाएका छन् । सोमबार आर्थिक विधेयकमाथिको छलफलका क्रममा सांसदहरुले आइतबार सभामुखले प्रमुख प्रतिपक्षी र प्रतिपक्षी दलहरुको अनुपस्थितिमा संसद संचालन गरी बजेट पारित गराएको भन्दै सभामुख श्रेष्ठको भूमिकामाथि प्रश्न उठाएका हुन् । 
बैठकमा सांसद नरोत्तम बैद्यले संसदीय व्यवस्थामा प्रतिपक्षी विनै राति बजेट पास गर्ने अभ्यास गरेकोमा आपत्ति जनाउँदै उनले सभामुखलाई सत्तापक्षको लाचार छायाँ बनेको बताए । सांसद रत्न ढकालले आफुले खर्च कटौति सम्बन्धी प्रस्ताव राखेकोमा छलफल गर्न नपाएको भन्दै आक्रोश व्यक्त गरे । उनले आइतबारको बैठकमा बत्ति गएपछि सभामुखले विना जानकारी अघि बढेको भन्दै सभामुख र सत्तापक्षले बलपूर्वक अघि बढ्नुलाई ‘कालो दिन’ को संज्ञा दिए । उनले सत्तापक्षले हतास मनस्थितिबाट आफुहरुमाथि अपमान गरेको बताए । सांसद गिता वाग्लेले सभामुख संसदको अभिभावक भएको भन्दै सबैको सम्मानबारे ध्यान दिनुपर्नेमा जोड दिईन् । 
सांसद विशाल खड्काले सत्तापक्षले बोल्दा हास्ने र विपक्षी दलका सांसदले बोल्दा रुलिङ गरेको भन्दै सभामुख श्रेष्ठको व्यवहारप्रति आपत्ति जनाए । बैठकमा सांसद राधा घलेले अन्धकारमा विना प्रतिपक्ष संसद चलाएको भन्दै सभामुखको भुमिकाबारे आपत्ति जनाईन् । बैठकमा सांसद विजया केसी श्रेष्ठले आधा रातमा निर्णय बानि परेको एमालेले सभामुखलाई समेत विवादमा पारेको बताईन् । सांसद रमेश पौड्यालले मूख्यमन्त्री नै बोलिरहँदा विद्युत जानुले प्रदेशको अवस्था झल्किएको भन्दै बत्ति निभेको समयमा प्रतिपक्षी विनै बजेट पारित गर्नुपर्ने के हतारो भयो भन्दै सरकारसंग प्रश्न गरे । उनले गएगुज्रेको र कनिका छरेको बजेटप्रति आपत्ति समेत जनाए । 
बैठकमा सत्तापक्षीय सांसद दिपक निरौलाले सबै दलसंगको छलफलको आधारमा अघि बढेको दावी गरेका थिए । सांसद नारायणबहादुर सिल्वालले संसदमै छलफल गर्नुपर्नेमा बाहिरिनु गलत भएको बताए । बैठकले प्रदेश सरकारको अर्थसम्बन्धी प्रस्तावलाई कार्यान्वयन गर्न बनेको विधेयक बहुमतले पारित गरेको छ ।