देउवालाई विश्वासको मत दिने एमाले नेता नेपालको वचन

३१ असार, हेटौंडा । नेकपा एमालेका वरिष्ठ नेता माधवकुमार नेपालले प्रधानमन्त्री शेरबहादुर देउवालाई विश्वासको मत दिने बचन दिएका छन् । सरकार गठनमा निर्णायक भूमिका खेलेका नेता नेपाले प्रधानमन्त्री देउवालाई विश्वासको मत दिने बचन दिएका हुन् ।
बुधबार प्रधानमन्त्री देउवा नेता नेपाललाई भेट्न उनको कोटेश्वर स्थित नेपाल निवास पुगेका थिए । भेटमा नेता नेपालले प्रधानमन्त्री देउवालाई आफ्नो समूहका सांसदहरुले विश्वासको मत दिने आश्वासन दिएका थिए ।
छलफलका क्रममा नेता नेपालले सरकारलाई भ्रष्टाचाररहित बनाउन र जनभावना अनुसार काम गर्न सुझाव दिएको भेटमा सहभागी नेता राजेन्द्र पाण्डेले पत्रकारहरुलाई जानकारी दिए ।
देउवाले संविधानको धारा ७६(५) अनुसार प्रधानमन्त्रीमा दाबी गर्न एमालेका २६ सांसदले हस्ताक्षर गरेका थिए । तर उनी र केपी शर्मा ओली दुबैको दाबी नपुगेको भन्दै प्रतिनिधिसभा भंग भएपछि देउवालाई प्रधानमन्त्री नियुक्त गर्न परमादेशको माग गर्दै सर्वोच्च अदालत गएका १४६ सांसदमा नेपाल समूहका २३ जना थिए ।
सोमबार फैसला सुनाएको सर्वोच्चले संसद पुनस्र्थापना गर्नुका साथै देउवालाई प्रधानमन्त्री नियुक्त गर्न परमादेश दियो । साथै ७६(५)को प्रधानमन्त्री नियुक्तिका लागि समर्थन गर्दा वा विश्वासको मत दिँदा हृवीप नलाग्ने र दल त्यागसम्बन्धी कारबाही नहुने पनि गरेको थियो ।