नेपाली सेनाको पुनःसंरचना कार्यान्वयन, आठ पृतना आजदेखि खारेज

google

२ साउन, हेटौंडा । नेपाली सेनाको साङ्गठनिक पुनः संरचना २०७७÷०७८ आजबाट कार्यान्वयनमा आएको छ । नेपाली सेनाले काठमाडौं उपत्यका र सात प्रदेशमा रहेका आठ पृतना आजदेखि खारेज गरेसँगै साङ्गठनिक पुनः संरचना २०७७÷०७८ कार्यन्वयनमा आएको हो । उसले चार ठाउँमा केन्द्रित हुने गरी सांगठनिक पुनर्संरचना लागू गरेको हो ।
आठ पृतना खारेज गर्दै सेनाले अब कोशी, गण्डकी र कर्णाली नदी प्रणालीमा आधारित तीन र काठमाडौं उपत्यकाका लागि एक गरी चारवटा केन्द्रीय कमाण्ड बनाएको हो । यसलाई सेनाले तीन जोड एक केन्द्रीय कमाण्ड भनेको छ ।
कोशी पूर्वलाई पूर्वी कमाण्ड, काठमाडौं उपत्यकाबाहेक कोशी र गण्डकी बीचको भू–भागलाई मध्य–कमाण्ड, काठमाडौं क्षेत्रलाई उपत्यका कमाण्ड र कर्णाली र सुदूरपश्चिमलाई समेटेर पश्चिम कमाण्डको संरचना तयार पारिएको छ ।
सैनिक मुख्यालयमा आज आयोजित कार्यक्रममा प्रधानसेनापति पुर्णचन्द्र थापाले नयाँ संरचना लागू भएको घोषणा गर्नुभयो । यसको पूर्ण कार्यान्वयन भने २०८१ असार मसान्त सम्ममा भइ सक्ने सेनाले जनाएको छ ।
अधिकृत र सकल दर्जासँग सम्बन्धित दरबन्दिहरुको हकमा भने क्रमिक रुपमा आगामी ६ वर्षको अवधि भित्र पूरा गरिने सेनाले लक्ष्य राखेको छ । गत फागुनमै मन्त्रिपरिषदले नयाँ संरचना लागू गर्न स्वीकृति दिए पनि बजेटलगायतका कारण ढिलाइ भएको सेनाले जनाएको छ ।