देउवाले आज विश्वासको मत लिने,माधव समुहले मत दिने

३ साउन,हेटौंडा। प्रधानमन्त्री शेरबहादुर देउवाले आज विश्वासको मत लिने भएका छन। संविधानको धारा ७६ को उपधारा ५ बमोजिमको प्रधानमन्त्री बनेका देउवाले १ महिना भित्र सदनबाट विश्वासको मत लिन पर्ने प्रावधान अनुसार नै देउवाले आज बस्ने प्रतिनिधिसभाको बैठकमा विश्वासको मत लिन लागेका हुन।  

यता धारा ७६ को उपधारा ५ बमोजिमको सरकार गठनका लागि सांसदहरु स्वतन्त्र हुने भएकाले दलीय ह्वीप नलाग्ने व्याख्या सर्वोच्चले गरिसकेको छ।एमालेको माधवकुमार नेपाल समूह बाहेक देउवासँग कांग्रेसका ६१,माओवादीका सभामुख बाहेक ४८,जसपाका १२ र जनमोर्चाका १ गरी १२२ जना सांसदको साथ प्रष्ट छ भने जसपाको उपेन्द्र यादव समुहमा ठाकुर समुहका ६ जना सांसद थपिएको दाबी गरेपछि देउवाको पक्षमा १२८   सांसद पुगेका छन।  

अहिले सम्मको अंक गणित अनुसार देउवासंग माधवकुमार नेपाल समूह बाहेकका १२८ सांसदको समर्थन जुटेको छ।उनलाई अब बहुमत जुटाउन ८ जना सांसदको आवश्यक रहन्छ ।

यता मतदानकै आधारमा सांसदहरुलाई कारबाही गर्न नमिल्ने पनि सर्वोच्चको फैसला गरिसकेकोले माधव समुहका २३ सांसदले देउवालाई प्रधानमन्त्री बनाउन दिएको समर्थनले पनि देउवालाई बहुमत पुग्ने पक्का भएपछि देउवाले आज विश्वासको मत लिने भएका हुन। 

आज ४ बजे बस्ने पहिलो बैठकमा संसद अधिवेशन सम्बन्धी राष्ट्रपतिको पत्र पढेर सुनाइने छ। त्यसपछि दलका तर्फबाट नेताहरुले बोल्न चाहेमा समय दिने तयारी सभामुखले गरेका छन्।यता राजनैतिक पण्डितहरू भन्छन माधव समुहले संसद् जोगाउन पनि देउवालाई विश्वासको मत दिनुपर्ने भएकाले उनीलाई मत दिने विश्लेषण गरेका छन।