बागमती प्रदेश युवा परिषदले युवा दिवसमा सप्ताहव्यापी कार्यक्रम गर्ने

२४ साउन, हेटौंडा । बागमती प्रदेशको प्रदेश युवा परिषद बागमती प्रदेशले अन्तराष्ट्रिय युवा दिवस सप्ताहव्यापी कार्यक्रम गरि मनाउने भएको छ ।
आइतबार हेटौंडा-४ मा रहेको प्रदेश युवा परिषदको कार्यालयमा पत्रकार सम्मेलनको गरि परिषदका कार्यकारी उपाध्यक्ष सन्तोष चौलागाईले सप्ताहव्यापी कार्यक्रम सार्वजनिक गरेका हुन् ।
कार्यक्रमको पहिलो दिन साउन २८ गते प्रदेश युवा परिषदको कार्यालयको औपचारिक उद्घाटन बागमती प्रदेशका मुख्यमन्त्री डोरमणि पौडेलद्वारा सामाजिक विकास मन्त्री सरस्वती बस्नेतको उपस्थितिमा हुनेछ । त्यही दिन १३ वटै जिल्लामा जिल्ला युवा परिषदको कार्यालयको समेत औपचारिक उद्घाटन हुनेछ ।
साउन २९ गते जिल्ला युवा समिति मकवानपुरको समन्वयमा रक्तदान कार्यक्रम, साउन ३० गते जिल्ला खेलकुद विकास समिति मकवानपुरको समन्वयमा ५ किलोमिटर खुल्ला दौड, साउन ३१ गते बाललकल्याण समाजको समन्वयमा कोभिड–१९ संक्रमणको परिवेशमा बालबालिकालाई बालश्रमबाट जोगाउन ज्ञापनपत्र बुझाउने कार्यक्रम तय भएको चौलागाईंले पत्रकार सम्मेलनमा जानकारी दिए ।
त्यसैगरी भदौ १ गते शिक्षाको लागि राष्ट्रिय अभियानको समन्वयमा अन्तरक्रिया र हेटौंडा लेडी जेसिजको समन्वयमा ‘खाद्य प्रणालीमा रुपान्तरण: मानव र भुमण्डलीय स्वास्थ्यको लागि युवा नवप्रर्वतन’ विषयमा वक्तृत्वकला कार्यक्रम हुनेछ ।
भदौ २ गते स्वास्थ्य सावधानी अपनाएर सप्ताहव्यापी कार्यक्रम समापन गरिने चौलागाईंले बताए । दिवसको तयारीका लागि परिषदले केहीदिन अघिदेखि नै विभिन्न सरोकारवालाहरूसंग कार्यक्रमबारे छलफल गरेको थियो ।
संयुक्त राष्ट्रसंघले अगष्ट १२ लाई प्रत्येक वर्ष युवा दिवसको रुपमा मनाउन थालेपछि नेपालले सन् २००४ बाट मनाउन थालेको हो । साउन २८ गते मनाइने दिवसको यसबर्षको नारा 'खाद्य प्रणालीमा रूपान्तरण: मानव र भूमण्डलीय स्वास्थ्यका लागि युवा नवप्रवर्तन' रहेको छ ।