असोज मसान्तसम्म १ करोड ८ लाख ६० हजार मात्रा खोप आउने

२९ साउन, हेटौंडा । स्वास्थ्य राज्य मन्त्री उमेश श्रेष्ठले आगामी असोज मसान्तसम्म थप १ करोड ८ लाख ६० हजार मात्रा खोप नेपाल आउने सुनिश्चित भएको जानकारी दिएका छन् । 
बिहीवारको प्रतिनिधि सभा बैठकमा सार्वजनिक महत्वको विषयमा बोल्दै स्वास्थ्य तथा जनसंख्या राज्यमन्त्री उमेश श्रेष्ठले हालसम्म १ करोड ८ लाख ६० हजार १ सय ७० मात्रा कोभिड १९ विरुद्धको खोप प्राप्त भएको जानकारी दिएका हुन् । 
उनले असोज मशान्तसम्म १ करोड २ लाख प्राप्त हुने र माघ मशान्तसम्ममा ३ करोड २३ लाख मात्रा खोप प्राप्त हुने जानकारी दए । त्यस्तै माघ महिनासम्ममा ५ करोड २३ लाख मात्रा उपलब्ध राज्यमन्त्री श्रेष्ठको भनाई छ ।
नेपाली जनतालाई कुल ५ करोड ५० लाख खोप आवश्यक रहेको उल्लेख गर्दै राज्यमन्त्री श्रेष्ठले केपी ओली नेतृत्वको सरकारले ९७ लाख खोप प्राप्त गरी असार महिनाको अन्तिमसम्ममा ४२ लाख खोप जनतालाई उपलब्ध गराइएको जानकारी दिए । 
उनले नयाँ सरकारले ७५ लाख खोप लगाएको उल्लेख गर्दै वर्तमान सरकारले दैनिक १ लाख ५० हजारदेखि २ लाखसम्म खोप लगाएको दावी गरे ।
राज्य मन्त्री श्रेष्ठले विगत एक हप्ताको आँकडा अनुसार कोभिड १९ को संक्रमणदर बढेकोले सबैलाई जनस्वास्थ्यको मापदण्ड अपनाएर सुरक्षित हुन अपिल गरेका छन् ।