काँग्रेसको १४ औं महाधिवेशन मंसीर दोस्रो साता हुने

३१ साउन, हेटौंडा । नेपाली काँग्रेसको १४ औं महाधिवेशन आगामी मंसीर ९ गतेदेखि १३ गतेसम्म हुने भएको छ । काँग्रेस केन्द्रिय कार्य समितिको शनिबार सम्पन्न बैठकले मंसीरको दोस्रो साता पार्टीको १४ औ महाधिवेशन गर्ने निर्णय गरेको हो । 
पार्टीका केन्द्रिय सदस्यहरुको ३ दिनसम्मको लगातार छलफल गरी महाधिवेशनको मिति मंसीर ९, १०, ११, १२ र १३ गते पाँच दिनमा सम्पन्न गर्ने निर्णय गरिएको पार्टीका प्रवक्ता विश्वप्रकाश शर्माले जानकारी दिए ।
महाधिवेशन अन्तरगत भदौ १८ गते वडा अधिवेशन गरिनेछ । पार्टीको बैधानिकता कायम हुने गरी महाधिवेशनको तयारीका लागि वडा अधिवेशन सो मितिमै गर्ने निर्णय लिइएको पनि प्रवक्ता शर्माले बताए ।
बैठकले तोकेको कार्यतालिका अनुसार भदौ २७ गते गाउँनगरपालिका अधिवेशन, असोज १ गते प्रतिनिधिसभा क्षेत्रीय अधिवेशन गरिनेछ । त्यसैगरी कार्तिक १०, ११ र १२ गते प्रदेश अधिवेशन सम्पन्न गरिनेछ । 
दशैं तिहार जस्ता चाड पर्वका कारण प्रदेश अधिवेशनको मिति भने पर सार्नु परेको स्पष्ट पार्दै प्रवक्ता शर्माले केन्द्रिय महाधिवेशन भने काठमाडौंमा मंसीर ९ गतेबाट सुरु हुने जानकारी दिए । काँग्रेसले भदौंको १८ गते बाट नै वडा तहको अधिवेशन सम्पन्न गरेर पार्टीको वैधानिक व्यवस्थालाई जोगाएको दावी समेत गरेको छ ।