अब कांग्रेस आर्थिक रूपमा पनि जनता र कार्यकर्तासंग जोडिनुपर्छ: बानियाँ

७ भदौ, हेटौंडा । नेपाली कांग्रेसको पूर्वाधार र रोजगार समितिका सहसंयोजक एवं बागमती प्रदेश संसदीय दलका नेता इन्द्रबहादुर बानियाँले अब कांग्रेस आर्थिक रूपमा पनि जनता र कार्यकर्तासंग जोडिनुपर्नेमा जोड दिएका छन् । 
नेपाली कांग्रेस लगानी पूर्वाधार र रोजगारः दृष्टिकोण एवं दिगो परियोजना केन्द्रित विशेष समितिको आयोजनामा 'गरिखाने कांग्रेस बनाउने' अभियान अन्तरगत नेपाली कांग्रेसका १४ जिल्लाका सभापतिहरुको दोस्रो चरणको कार्यक्रममा सोमबार काठमाडौंमा बोल्दै उनले अब जनता र कार्यकर्तालाई आर्थिक रूपमा सक्षम बनाउनुपर्नेमा जोड दिए ।
उनले हरेक बर्गलाई श्रम र उद्यमसंग जोडेर आत्मनिर्भर बनाउनेतर्फ कांग्रेसले काम गर्नुपर्ने बताए । उनले राजनीतिक रूपमा त्याग र समर्पणबाट कांग्रेस अहिलेको अवस्थामा आइपुगेको भन्दै उनले अब जनता र कार्यकर्तालाई त्याग र समर्पणसंगै आर्थिक रूपमा बलियो बनाउनुपर्ने बताए । यसका लागि पूर्वाधार र रोजगार समितिले 'गरिखाने अभियान' संचालन गरेको बताए । आमनागरिकको जनजीविका र अवसरको व्यवस्थाका लागि समितिले दिएको सुझावलाई पार्टीले नीति निर्माणका क्रममा लागु गर्नुपर्ने उनको सुझाव थियो । कार्यक्रममा समितिको भावी योजनाबारे छलफल गरिएको थियो ।
कार्यक्रममा समितिका संयोजक बिनोद चौधरी, सहसंयोजक एवं स्वास्थ्य राज्यमन्त्री उमेश श्रेष्ठ, दिपक खड्का, अनिल रुङाटा, संविधानसभा सदस्य राजिव विक्रम शाह, समितिका सदस्यहरू भक्तप्रल्हाद पाण्डे र विमल ढकाल लगायतको उपस्थिति रहेको थियो ।