अष्टलक्ष्मीलाई झडका, अष्टलक्ष्मी नेतृत्व सरकारका एक मन्त्रीले त्यागे एमाले

९ भदौ, हेटौंडा । बागमती प्रदेशका सामाजिक विकास मन्त्री कृष्णप्रसाद खनालले नेकपा एमाले परित्याग गरेसँगै बागती प्रदेशका मुख्यमन्त्री अष्टलक्ष्मी शाक्यको मुख्यमन्त्री पद धरापमा परेको छ । 
मन्त्री खनालले बुधबार माधव नेपाल नेतृत्वको नेकपा एकीकृत समाजवादी नामको नयाँ दल दर्तामा हस्ताक्षर गरेसँगै नेकपा एमाले परित्याग गर्नुभएको हो । उहाँले  केन्द्रीय सदस्यहरुको तर्फबाट ५२ नम्बरमा सनाखत गर्नुभएको छ । 
मन्त्री खनालले पार्टी परिवर्तन गरेसँगै बागमती प्रदेशका नवनियुक्त मुख्यमन्त्री अष्टलक्ष्मी शाक्यको पद भने धरापमा परेको हो । मुख्यमन्त्री शाक्यले नेकपा एमालेको तर्फबाट सरकारको नेतृत्व गरिरहँदा बागमती प्रदेशमा नेकपा एमालेको ५६ जना सांसद रहेका थिए । तर पार्टी विभाजन भएसँगै उनको मुख्यमन्त्री धरापमा परेको हो । 
उनलाई सरकार जोगाउन कुल १ सय ९ जना सांसद मध्ये ५५ जनाको साथ आवश्यक पर्नेमा क्याविनेटका सदस्यले नै पार्टी परिवर्तन गरेपछि स्वभाविक रुपमा शाक्यलाई मुख्यमन्त्री पद जोगाउन कठिन हुने देखिएको छ । 
नेकपा एकीकृत समाजवादी दल दर्ता हुनुभन्दा अगाडीवाटै प्रदेश सभा सदस्य राजेन्द्र पाण्डे र मुनु सिग्देल केन्द्रीय सदस्यमा चयन भइसकेकोलेपनि शाक्यलाई मुख्यमन्त्री पद जोगाउँन निश्चित रुपमा समस्या हुने भएको हो । अव नेकपा एमाले पूर्णरुपमा फुटेपछि बागमती प्रदेशमा सत्ताको खेल सुरु हुने स्पष्ट भएको छ ।