बागमती प्रदेशमा मन्त्रालय फुटाएर १० मन्त्री नियुक्त (नाम सहित)

२३ भदौं, हेटौंडा । नेकपा एमाले १३ सांसदले नेकपा एस रोजेपछि अल्पमतमा परेकी बागमती प्रदेशकी मुख्यमन्त्री अष्टलक्ष्मी शाक्य मन्त्रालय फुटाएर मन्त्रिमण्डल विस्तार गरेकी  छिन । मुख्यमन्त्री शाक्यले बुधबार सामाजिक विकास मन्त्रालय फुटाएर स्वास्थ्य मन्त्रालय थप गर्दै ६ जना मन्त्री र ४ जना राज्यमन्त्री नियुक्त गरेकी हुन।

मुख्यमन्त्री शाक्यले यस अघि आन्तरिक मामिला तथा कानून मन्त्री तथा भौतिक पूर्वाधार विकास मन्त्री रहेका केशवराज पाण्डेलाई भौतिक पूर्वाधार मन्त्री,रचना खड्कालाई आर्थिक मामिला तथा योजना मन्त्री, विजय सुवेदीलाई सामाजिक विकास मन्त्री,शान्ति प्रसाद पौडेललाई उद्योग, पर्यटन वन तथा वातावरण मन्त्री,प्रदिप कुमार कटुवाल क्षेत्रीलाई स्वास्थ्य मन्त्री डाक्टर अजय क्रान्ति शाहीलाई आन्तरिक मामिला तथा कानून मन्त्री, चन्द्र लामालाई भुमी व्यवस्था, कृषि सहकारी मन्त्री त्यसैगरी जीवन खड्कालाई भौतिक पूर्वाधार विकास राज्यमन्त्री, जुनेली श्रेष्ठलाई सामाजिक विकास राज्यमन्त्री, सरस्वती बाटीलाई उद्योग, पर्यटन वन तथा पर्यटन राज्यमन्त्री र बद्री मैनालीलाई भुमी व्यवस्था, कृषि सहकारी राज्यमन्त्री नियुक्त गरेकी हुन । नवनियुक्त मन्त्रीहरूले पद तथा गोपनियताको शपथ ग्रहण गरेका छन । 

बागमती प्रदेश प्रमुखको कार्यालयमा प्रदेश प्रमुख यादव प्रसाद शर्माको उपस्थितिमा पद तथा गोपनियताको शपथ ग्रहण गराइएको हो । १० सदस्यीय मन्त्रिमण्डल विस्तार सँगै अल्पमतमा परेकी शाक्य नेतृत्व सरकारको मन्त्री संख्या १२ जना पुगेको छ । एमाले विभाजनपछि माधव कुमार नेपाल निकटी मानिएकी शाक्य भदौं २ गते  एमाले रोजेर नेकपा एमालेको बहुमतका आधारमा मुख्यमन्त्री भएपनि बागमती प्रदेशसभाका एमालेबाट निर्वाचित १३ जना सांसदले नेकपा एस रोजेपछि अल्पमतमा परेकी छिन ।