मकवानपुर कांग्रेस बुथ प्रतिनिधिमा एक तेस्रो लिंगी, महिलाको प्रतिनिधित्व बढ्यो

२५ भदौ, हेटौंडा । नेपाली कांग्रेसको १४ औं महाधिवेशन अन्तरगत मकवानपुरमा भएको अधिवेशनमा महिलाको प्रतिनिधित्व बढेको छ ।
कांग्रेसको विधानलाई समावेशी अवधारणा अनुसार अघि बढाउँदा बुथ प्रतिनिधि (क्षेत्रीय प्रतिनिधि) मा महिलाको प्रतिनिधित्व बढेको हो । मकवानपुरमा आदिवासी जनजाति महिलातर्फ १ सय ८२ जना, प्रत्यक्ष महिलातर्फ ३०४ जना, खस आर्य महिलातर्फ ४९ जना महिलाको प्रतिनिधित्व भएको छ । अन्य समूहमा पनि महिलाको प्रतिनिधित्व रहेको छ । 
मकवानपुर कांग्रेसको बुथ प्रतिनिधिमा ७८ जना दलित, आदिवासी जनजाति खुल्लातर्फ २ सय ५४, प्रत्यक्ष खुल्लातर्फ ६ सय १९, खस आर्य खुल्लातर्फ १ सय १ जना, अल्पसंख्यक वा अपांगतातर्फ ५४, मुस्लिम १०, मधेशी १२ र थारु ३ जना बुथ प्रतिनिधिमा छनौट भएको सहायक निर्वाचन अधिकृत अधिवक्ता मोहनप्रसाद ढकालले जानकारी दिए । 
मकवानपुरमा कांग्रेस बुथ प्रतिनिधिमा एकजना तेस्रो लिंगी पनि छनौट भएका छन् भने एक जना महिला वडा सभापति निर्वाचित भएकी छिन् । मकवानपुरमा निर्वाचन प्रक्रियाबाट १६ सय ७७ र १ सय २ वडा सभापति स्वतः बुथ प्रतिनिधि हुने प्रावधान अनुसार १७ सय ७९ बुथ प्रतिनिधि चयन भएको ढकालले जानकारी दिए । ति बुथ प्रतिनिधिले जिल्ला कार्यसमितिसम्मलाई मतदान गर्ने छन् ।