बागमती प्रदेश पहिलो साक्षर प्रदेश घोषणा

११ असोज, हेटौंडा । बागमती प्रदेशलाई देशकै पहीलो साक्षर प्रदेशको रुपमा सोमबार घोषणा गरिएको छ । सामाजिक विकास मन्त्रालयमा एक कार्यक्रमको आयोजना गर्दै प्रदेशकी मुख्यमन्त्री अष्टलक्ष्मी शाक्यले साक्षरता प्रदेश घोषणा गरेकी हुन् ।
उक्त अवसरमा मुख्यमन्त्री शाक्यले साक्षर बागमती प्रदेश घोषणा २०७८ लेखिएको स्तम्भ सार्वजानिक गरेकी थिइन् ।
कार्यक्रममा मुख्यमन्त्री शाक्यले बागमती प्रदेशमा साक्षर प्रदेश घोषणा गर्न आवस्यक लक्ष्य मात्रै हासिल गरेको भन्दै प्रदेशलाई पूर्ण साक्षर बनाउनुपर्नेमा जोड दिइन् । उनले अझै केही प्रतिशत जनसंख्या साक्षर बनाउन बाकी रहेकोले उक्त जनसंख्या लक्षीत शिक्षा निती बनाउनुपर्ने बताईन् ।
बागमती प्रदेश भित्रका १५ देखि ६० बर्ष उमेर समूहका ९५ प्रतिशत भन्दा बढी जनसंख्या साक्षर रहेकोले प्रदेशलाई साक्षर प्रदेश घोषणा गरिएको कार्यक्रमका अवसरमा जानकारी गराइएको थियो ।
गत २०७१ असार २ गते सिन्धुपाल्चोक जिल्लालाई साक्षर जिल्ला घोषणा गर्दै अभियान सुरु भएकोमा यही असोज ४ गते काठमाडौं जिल्लालाई साक्षर जिल्ला घोषणा गरिएको थियो ।
शिक्षा विकास निर्देशनालय बागमती प्रदेशका अनुसार धादिङमा (९८.४०), मकवानपुरमा (९८.९७), चितवनमा (९७.५०), नुवाकोट (९८.१९), भक्तपुरमा (९६.७०), रामेछापमा (९६.४०), सिन्धुलीमा (९९.१३), रसुवामा (९६.२९), काभ्रेपलान्चोकमा (९६.४८) काठमाडौंमा (९६.८८) र सिन्धुपाल्चोकमा (९७.६८) प्रतिशत साक्षरता रहेको छ ।