शाक्य नेतृत्वको सरकारको आयु लम्बियो, निर्णय कार्तिक ४ मा हुने

२४ असोज, हेटौंडा । बागमती प्रदेशकी मूख्यमन्त्री अष्टलक्ष्मी शाक्यले विश्वासको मतका लागि प्रदेशसभामा प्रस्ताव पेश गरेकी छिन् । 
बागमती प्रदेशसभाको आइतबार शुरु भएको नवौं अधिवेशनको दोस्रो बैठकमा मूख्यमन्त्री शाक्यले विश्वासको मतका लागि प्रस्ताव पेश गरेकी हुन् । नेकपा एमाले विभाजन भएसंगै सरकार अल्पमतमा परेपछि उनले ३० दिनभित्र विश्वासको मत लिनुपर्ने संवैधानिक व्यवस्था अनुसार प्रदेशसभामा मतका लागि प्रस्ताव पेश गरेकी छिन् । तर विश्वासको मतको प्रस्ताव कार्तिक ४ गते बस्ने बैठकबाट निर्णय हुने भएको छ । 
संसद नियमावलीमा रहेको सभामुखको तजविजी अधिकार र विपक्षी गठनबन्धनका नेकपा माओवादी केन्द्र, नेपाली कांग्रेस र नेकपा एकिकृत समाजवादीबीच सरकार गठनबारे निर्णय भई नसक्दा अंकगणितका आधारमा अल्पमतमा रहेपनि नेकपा एमाले नेतृत्वको बागमती प्रदेश सरकारको आयु कार्तिक ४ गतेसम्म लम्बिएको छ ।
संसदको नवौं अधिवेशनको पहिलो बैठकमा मूख्यमन्त्री अष्टलक्ष्मी शाक्य, नेकपा एमाले संसदीय दलका प्रमुख सचेतक दिपक निरौला, नेकपा माओवादी केन्द्र संसदीय दलका नेता शालिकराम जम्कट्टेल, नेपाली कांग्रेस संसदीय दलका नेता इन्द्रबहादुर बानियाँ, नेकपा एकिकृत समाजवादी संसदीय दलका नेता राजेन्द्र पाण्डे, विवेकशिल साझा पार्टीका सांसद रमेश पौड्याल, नेमकिपाका सुरेन्द्रराज गोसाई, राप्रपाकी रिता माझी र सांसद प्रेम तामाङले नवौं अधिवेशन एवं विजयादशमीको शुभकामना दिएका थिए ।