कोलकोतालाई हराउँदै चेन्नईले जित्यो आईपीएलको उपाधि

३० असोज, हेटौंडा । चेन्नई सुपर किङ्सले ईन्डियन प्रिमियर लिग (आईपीएल) टी–२० क्रिकेटको उपाधि जितेको छ । दुबईमा शुक्रबार राति सम्पन्न भएको फाइनलमा कोलकाता नाइट राइडर्सलाई २७ रनले पराजित गर्दै चेन्नई च्याम्पियन बनेको हो । 
चेन्नईले दिएको १ सय ९३ रनको लक्ष्यसहित ब्याटिङ गरेको कोलकाताले २० ओभरमा ९ विकेट गुमाएर १ सय ६५ रन मात्र बनाउन सक्यो । कोलकाताका लागि शुबमन गिल ५१, भेन्कातेस एयरले ५० तथा शिबम माभीले २० र लक्की फर्गुसनले अविजित १८ रन जोडे । कोलकोताका बाँकि खेलाडीले दोहोरो रन समेत बनाउँन सकेनन् । चेन्नईका लागी सार्दुल ठाकुरले ३, रविन्द्र जडेजा र जोश हाजलउडले २÷२ तथा दिपक चाहर र ड्वाने ब्राभोले १÷१ विकेट लिए । 
यस अघि पहिले ब्याटिङ चेन्नईले २० ओभरमा ३ विकेट गुमाएर १ सय ९२ रन बनाएको थियो । चेन्नईका फाप डु प्लेसिसले ८३ रनको अर्धशतकीय इनिङ्स खेले । यस्तै मोइन अलिले अविजित ३७  रन जोड्दा रुतुराज गायकवाडले ३२ तथा रोबिन उथप्पाले ३१ रन बनाए ।
कोलकाताका लागी सुनिल नारिनले २ तथा शिबम माभीले १ विकेट लिए । यससँगै चेन्नईले चौंथो पटक आईपीएलको उपाधि जित्न सफल सफल भएको छ । कोलकाताको भने तेस्रो पटक उपाधि जित्ने सपना अधुरो भएको छ ।