सरकारी कर्मचारीलाई दुर्व्यवहार गर्ने सिके राउतका कार्यकर्तालाई मुद्दा

फाइल फोटो

५ कार्तिक,जनकपुर। सरकारी कर्मचारीलाई अर्धनग्न पारेर नगर घुमाउने सि के राउतका १७ जना कार्यकर्ता विरुद्ध मुद्दा दर्ता गरिएको छ। खानेपानी तथा ढल निकास कार्यालय जनकपुरका निमित्त प्रमुख राजेश कुशवाहालाई  कार्यालय प्रवेश गरी बन्धक बनाएर दुरव्यवहार गर्ने १७ जनाविरूद्ध जिल्ला प्रहरी कार्यालय धनुषाले मुद्दा दर्ता गरेको हो। 

जनमत पार्टीका धनुषा अध्यक्ष ओमविक्रम कुशवाहा, सर्लाही जिल्ला सदस्य दुर्योधन यादव, प्रेम किशोर यादव, केन्द्रीय सदस्य वीरेन्द्र महतो, विद्यार्थी जनमत संघका अध्यक्ष विजय यादव, नेताहरू संजय प्रधान, धनिकलाल कापर, विक्रमकुमार साह, कैलाशप्रसाद साह, दिनेश रजक साफी, रामकरण यादव, संजय कुमार सिंह, सञ्जय साह, महेश कुमार यादव, अमरनाथ साह र सुन्दर मण्डल विरूद्ध अपराधी प्रवेश तथा अपराधी उपद्रव शीर्षकमा मुद्दा चलाइएको धनुषाका प्रहरी प्रवक्ता प्रहरी नायब उपरीक्षक जितेन्द्र बस्नेतले बताएका छन।उनीहरुलाई सरकारी वकिलको कार्यालयमार्फत् मुद्दा दर्ता गराइएको बुझिएको छ। 

जनमत पार्टीका कार्यकर्ताले नगरमा ढलको नाममा खाल्टो खनेको र समयमा नपुरेको भन्दै बिहीबार दिउँसो कुशवाहालाई कुटपिट गर्दै कार्यालयबाटै उठाएर अर्धनग्न बनाई शरीरमा हिलो छ्यापेर जनकपुर परिक्रमा गराएका थिए।