टी–२० विश्वकपः भारतविरुद्ध पाकिस्तानको ऐतिहासिक जित

८ कार्तिक, हेटौंडा । दुबई र ओमानमा सुरु भएको आईसीसी टी–२० विश्वकप क्रिकेटमा पाकिस्तानले ऐतिहासिक विजयी सुरुआत गरेको छ । दुबईमा आइतबार राति चिरपरिचित प्रतिद्वन्दी भारतलाई १० विकेटले पराजित गर्दै पाकिस्तानले सुखद सुरुआत गरेको हो ।
यससँगै पाकिस्तानले विश्वकपमा भारतमाथि पहिलो पटक ऐतिहासिक जित निकालेको छ । यस अघि पाकिस्तानले विश्वकपमा भारतलाई हराउन सकेको थिएन । यस्तै भारत पहिलो पटक टी–२० अन्तराष्ट्रियमा १० विकेटले पराजित भएको छ । 
भारतले दिएको १ सय ५२ रनको लक्ष्य पाकिस्तानले १७ ओभर ५ बलमा बिना विकेटको क्षतीमा पूरा गर्यो । पाकिस्तानको जितमा कप्तान बाबर आजम र मोहमद रिजवानले अर्धशतकीय इनिङ्स खेले । रिजवानले अविजित रहदै सर्वाधिक ७८ रन बनाए । कप्तान आजम ६८ रनमा अविजित रहे ।  
यस अघि टस हारेर पहिले ब्याटिङ गरेको भारतले २० ओभरमा ७ विकेट गुमाएर १ सय ५१ रन बनाएको थियो । भारतका लागि कप्तान विराट कोहलीले ५७ रनको अर्धशतकीय इनिङ्स खेले । यसैगरी ऋषव पन्त ३९, रविन्द्र जडेजा १३, सूर्यकुमार यादव र हार्दिक पान्डयले समान ११÷११ रन बनाउँदा अरुले दोहोरो अंकको स्कोरसम्म बनाउन सकेनन् । पाकिस्तानका शाहिन शाह अफ्रिदीले ३ विकेट, हसन अलिले २ तथा शादब खान र हरिस राउफले १÷१ विकेट लिए ।
जितसँगै पाकिस्तानले पहिलो खेलमै महत्वपूर्ण २ अंक जोडेको छ । पाकिस्तान समूह २ को शीर्ष स्थानमा रहेको छ । उपाधि दाबेदार मानिएको भारतले भने हारबाट प्रतियोगिताको सुरुआत गरेको छ ।