गठबन्धन सरकारले उद्योगी व्यवसायीको हितमा काम गर्छः नेता बानियाँ

८ कार्तिक, हेटौंडा । मकवानपुर उद्योग वाणिज्य संघको ५४ तथा ५५ औं वार्षिक साधारणसभा तथा अधिवेशन आइतबारबाट सुरु भएको छ । संघका अध्यक्ष कृष्ण कटुवालको सभाध्यक्षता तथा नेपाली कांग्रेस बागमती प्रदेश संसदीय दलका नेता ईन्द्रबहादुर बानियाँको प्रमुख आतित्थ्यतामा साधरण सभा भएको हो ।
सभालाई सम्बोधन गर्दै प्रमुख अतिथि बानियाँले केपी शर्मा ओली नेतृत्वको सरकारले संविधानसँगै उद्योगी व्यवसायीलाई समेत मास्न खोजेको आरोप लगाएका । उनले ओली सरकारले दुईपटक संसद् विघटन गर्नुको साथै कोरोनाले मारमा रहेका उद्योगी व्यवसायीको क्षेत्रमा कुनै वास्ता नगरेको आरोप लगाए । 
नेता बानियाँले कोरोनाले थलिएको उद्योग व्यापार क्षेत्रमा राज्यले विशेष प्याकेजको योजना ल्याउन नसकेको भन्दै उनले अब गठबन्धनको सरकारले यसतर्फ ध्यान दिने दावी गरे । उनले ओली नेतृत्वको सरकारले गरेको कमजोरीलाई सच्याँउदै उद्योगी व्यवसायीसँगै समग्र नेपालीको हितमा गठबन्धन सरकार अघि बढ्नुपर्नेमा जोड दिए । 
कार्यक्रममा बागमती प्रदेशसभा सदस्य मुनु सिग्देल, नेपाल उद्योग वाणिज्य महासंघका बागमती प्रदेश अध्यक्ष दिलसुन्दर श्रेष्ठ, नेपाल उद्योग वाणिज्य महासंघका केन्द्रीय सदस्य अरुणराज सुमार्गी, मकवानपुरका प्रमुख जिल्ला अधिकारी भरतमणि पाण्डे, मकवानपुर उद्योग वाणिज्य संघका पूर्व अध्यक्ष उत्तम शर्मा ढकाल, सिन्धुली उद्योग वाणिज्य संघका अध्यक्ष अमरेशकुमार बैदार, व्यवसायी कृष्णराज कोइरालालगायतले शुभकामना मन्तव्य व्यक्त गरेका थिए । 
साधारणसभाको सन्दर्भमा पूर्व मिस नेपाल श्रृङ्खला खतिवडा, संगीतकार शिखर सन्तोष, हेटौंडा खानेपानी व्यवस्थापन बोर्ड र मकवानपुर उद्योग वाणिज्य संघको पश्चिमी क्षेत्र समितिलाई जग्गा दान गरेका दाता रामचन्द्र बर्तौलालाई सम्मान गरिएको थियो । यसैगरी मकवानपुर उद्योग वाणिज्य संघको अगुवाईमा कोरोनाको समयमा सञ्चालन भएको कोभिड हेल्पडेस्कमा आबद्ध संघ संस्था र सहयोगीहरुलाई कदरपत्र प्रदान गरिएको थियो ।
यसैविच मकवानपुर उद्योग वाणिज्यसंघको नयाँ नेतृत्वका लागी सोमबारबाट निर्वाचन प्रकृया सुरु हुँदै छ । निर्वाचन कार्यक्रमबाट आगामी तीन बर्षीय कार्यकालका लागि नयाँ नेतृत्व चयन हुनेछ ।