मूख्यमन्त्री शाक्यले आज विश्वासको मत लिंदै

१० कार्तिक, हेटौंडा । बागमती प्रदेशकी मूख्यमन्त्री अष्टलक्ष्मी शाक्यले आज विश्वासको मत लिंदैछिन् । मूख्यमन्त्री शाक्यले असोज २४ गते प्रदेशसभा बैठकमा पेश गरेको विश्वासको मतसम्बन्धी प्रस्तावमाथि आज मतदान हुने भएको हो ।
बागमती प्रदेशसभाको कार्तिक ४ गते बसेको बैठकमा विश्वासको मतमाथि धारणा राख्ने क्रम सकिएकाले आजको बैठकमा विश्वासको मतसम्बन्धी प्रस्तावलाई मत विभाजन प्रक्रिया अनुसार टुंगो लगाईदै छ । सभामुख सानुकुमार श्रेष्ठले मत विभाजनका दिउँसो १ बजे प्रदेशसभा बैठक डाकेका छन् । अहिलेको प्रदेशसभाको समिकरण अनुसार मूख्यमन्त्री शाक्य अल्पमतमा रहेकी छिन् । 
१ सय ९ सांसद रहेको बागमती प्रदेशसभामा सत्तारुढ दल नेकपा एमालेसंग ४३ सांसद रहेका छन् । विश्वासको मतका लागि ५५ सांसद आवश्यक छ । शाक्यविरुद्धको गठबन्धनसंग नेकपा माओवादी केन्द्रका २३, नेपाली कांग्रेसका २२, नेकपा एकिकृत समाजवादीका १३ र जनता समाजवादीका एक गरी ५९ सांसद छन् । त्यस्तै, विवेकशिल साझा पार्टीको ३, नेमकिपाको २ र राप्रपाको २ सांसद रहेका छन् । 
नयाँ सरकार गठनका लागि शाक्यविरुद्धको गठबन्धनले नेकपा एकिकृत समाजवादी संसदीय दलका नेता राजेन्द्र पाण्डेलाई अघि सार्दै सांसदहरुको हस्ताक्षर संकलन गरिसकेको छ ।