देउवाको संयोजकत्वमा कांग्रेसको महाविधेशन आयोजक समिति गठन

२९ कार्तिक, काठमाडौं । नेपाली कांग्रेसका सभापति शेरबहादुर देउवाको संयोजकत्वमा १४ औं महाधिवेशन मूल तयारी समिति गठन भएको छ । देउवा निवास बुढानिलकण्ठमा बसेको केन्द्रीय कार्य समिति बैठकले देउवाको नेतृत्वमा महाधिवेशनको मूल तयारी समिति गठन गरेको हो ।
समितिको समस्यदमा पार्टी केन्द्रीय कार्य समितिका पदाधिकारी र सदस्यहरु, आमन्त्रित केन्द्रीय सदस्यहरु, संघीय संसदका सदस्यहरु, सात वटै प्रदेश संसदीय दलका नेता रहनेछन् । 
१४ औं महाधिवेशनले नेतृत्व मात्रै चयन गर्ने र केन्द्रीय कार्य समितिले पार्टीको नीति र कार्यक्रममा लागि छुट्टै महाधिवेशन गराउने निर्णय गरेको प्रवक्ता विश्वप्रकाश शर्माले जानकारी दिए ।
बैठकले सात वटै प्रदेश अधिवेशन गर्न पार्टीका नेताहरुलाई जिम्मेवारी समेत तोेकेको छ । प्रदेश १ मा पार्टीका नेता कृष्णप्रसाद सिटौलालाई संयोजकको जिम्मेवारी र स्थान विराटनगर तोकिएको छ । प्रदेश २ को संयोजकमा रमेश रिजाल र स्थान जनकपुर, बागमती प्रदेशको संयोजकमा पार्टीका पूर्वमहामन्त्री प्रकाशमान सिंह र स्थान हेटौडा, गण्डकी प्रदेशको संयोजकमा पार्टीका पूर्व उपसभापति गोपालमान श्रेष्ठ र स्थान पोखरा तोकिएको छ । 
त्यस्तै, लुम्विनी प्रदेशको संयोजक बालकृष्ण खाँण र स्थान बुटवल, कर्णाली प्रदेशको संयोजकमा केन्द्रीय सदस्य जीवनबहादर शाही संयोजक र स्थान सुर्खेत, सुदुरपश्चिम प्रदेशको संयोजकमा दिलेन्द्रप्रसाद बडु र स्थान धनगढी तोकिएको छ ।
कांग्रेसको प्रदेश तह अधिवेशन मंसिर १६ र १७ गते र १४ औँ महाधिवेशन मंसिर २४-२६ सम्म काठमाडौँमा हुने भएको छ ।