नेकपा एमालेको १०औं राष्ट्रिय महाधिवेशन आजदेखि शुरु

१० मंसिर, हेटौंडा । प्रमुख प्रतिपक्ष दल नेकपा एमालेको १०औँ राष्ट्रिय महाधिवेशन आजदेखि चितनवमा शुरु हुँदैछ । आज मध्यान्ह १२ बजे नारायणी नदी किनारमा महाधिवेशन उद्घाटन तथा ११ र १२ गते सौराहामा बन्दसत्र एवं नेतृत्व चयन गर्ने कार्यक्रम छ ।
महाधिवेशनको उद्घाटन अध्यक्ष केपी शर्मा ओलीले गर्ने कार्यक्रम छ । महाधिवेशन उद्घाटनका लागी अध्यक्ष ओली विहीबार नै चितवन पुगिसकेका छन् भने उनले महाधिवेशन स्थलको समेत अनुगमन गरेका छन् ।
महाधिवेशनमा सहभागी हुने अधिकांश नेता तथा प्रतिनिधिहरु पनि हिजो नै चितवन पुगिसकेका छन् । उद्घाटन कार्यक्रममा पाँच लाख नेता कार्यकर्ताको उपस्थिति हुने प्रचार विभाग प्रमुख योगेश भट्टराइले बताएका छन् । उद्घाटन पूर्व नवलपुरको गैँडाकोट र चितवनका विभन्न ठाउँ सहित ७ स्थानबाट जुलुसहरु निकाल्ने कार्यक्रम रहेको भट्टराइले जानकारी दिए ।
महाधिवेशनमा भारत, बंगलादेश, श्रीलंका कम्बोडिया लगायतका देशबाट प्रतिनिधि सहभागी हुनेछन् । चिनियाँ कम्युनिष्ट पार्टीको भिडियो सन्देश आएको प्रचार विभाग प्रमुख भट्टराईले बताए । महाधिवेशनमा दुई हजार १ सय ७५ प्रतिनिधि सहभागी हुनेछन् । 
भूगोल, जनसंगठन विभाग, सम्पर्क कमिटी र प्रवासबाट र मनोनित १०६ जना गरी दुई हजार १ सय ७५ प्रतिनिधि सहभागी हुनेछन् । महाधिवेशनमा १०३ जना पर्यवेक्षक रहने छन् । महाधिवेशनले २२५ सदस्यीय नेकपा एमालेको नयाँ कमिटी गठन गर्नेछ ।