बागमती प्रदेशका ६७ प्रतिशतले लगाए कोरोनाविरुद्ध पुरा डोज

१२ मंसिर, हेटौंडा । बागमती प्रदेशका ६७ प्रतिशत नागरिकले कोरोनाविरुद्धको पुरा डोज खोप लगाएका छन् ।
बागमती प्रदेश स्वास्थ्य मन्त्रालयका अनुसार हालसम्म कोरोनाको खोप लगाउने लक्षित उमेर समूह १८ बर्ष माथिका ६७ प्रतिशतले कोरोनाविरुद्धको पुरा डोज खोप लगाएका हुन् । बागमती प्रदेशका १३ जिल्लामा २८ लाख ४० हजार ६ सय ८५ जनाले कोरोनाविरुद्धको भेरोसेल, कोभिसिल्ड र जोनसनको पुरा डोज खोप लगाएका छन् । त्यसैगरी, पहिलो मात्रा खोप लगाउनेको संख्या १४ प्रतिशत रहेको छ । प्रदेशका ५ लाख ९५ हजार २० जनाले भेरोसेल, कोभिसिल्ड वा फाइजरमध्ये कुनै एक खोप पहिलो डोज खोप लगाएको मन्त्रालयका प्रवक्ता बसन्त अधिकारीले जानकारी दिए । 
१८ बर्ष माथिका खोप लगाउनु पर्ने १४ प्रतिशतले अझै पनि खोप लगाएका छैनन् । प्रदेशका १३ जिल्लामा १८ बर्ष माथिका ८ लाख २२ हजार ७ सय २ जनाले अझै पनि कोरोनाविरुद्धको कुनै पनि डोज नलाएको मन्त्रालयको भनाई छ । मन्त्रालयले लक्षित बर्गका सबैलाई खोप लगाउन उत्प्रेरित गरिरहेको र यसका लागि मन्त्रालय अन्तरगतका सबै स्वास्थ्य संस्थालाई परिचालित हुन निर्देशन दिएको स्वास्थ्य मन्त्री निमा लामाले बताए । 
खोपको पहुँच बाहिर रहेका १८ बर्ष माथिका नागरिकलाई खोप लगाउने वातावरण निर्माण गर्न सबै जिल्लाका स्वास्थ्य इकाई, जनप्रतिनिधि र नागरिक समाजले समन्वय गर्नुपर्नेमा उनको जोड छ । सबैलाई खोप सुनिश्चित गर्न मन्त्रालय तत्पर रहेको भन्दै कुनै कारणबश छुटेकाहरुलाई खोप अभियानमा सहभागी गराउन उनले आग्रह समेत गरेका छन् ।