एमाले: बरिष्ठ उपाध्यक्षसहित ५ पदाधिकारी निर्विरोध

फाइल तस्विर

१३ मंसिर, काठमाडौं । नेकपा एमालेको दशौं महाधिवेशनमा बरिष्ठ उपाध्यक्षसहित पाँचजना पदाधिकारी निर्विरोध निर्वाचित हुने भएका छन् ।
बिहान १० बजेसम्म उम्मेदवारी मनोनयन दर्ताको समयमा वरिष्ठ उपाध्यक्ष, महासचिव र उपमहासचिव निर्विरोध निर्वाचित हुने भएका हुन् ।
वरिष्ठ उपाध्यक्षमा ईश्वर पोखरेल, महासचिवमा शंकर पोखरेल र उपमहासचिवमा प्रदीप ज्ञवाली, पृथ्वी सुब्बा गुरुङ र विष्णु रिमालको मात्रै उम्मेदवारी परेपछि उनीहरु निर्विरोध निर्वाचित छन् । उनीहरुको नामको औपचारिक घोषणा भने भईसकेको छैन ।
पदाधिकारीमा अध्यक्षमा ओलीले आफुलाई मात्रै प्रस्ताव गरेपछि असहमति जनाएका थिए । अध्यक्ष ओलीको प्रस्तावमा नपरेकामध्ये अध्यक्षमा भीम रावल, उपाध्यक्षमा घनश्याम भुसाल, सचिवमा भीम आचार्य र टंक कार्कीले उम्मेदवारी दिएका छन् । ओलीले उपाध्यक्षमा युवराज ज्ञवाली, सुवासचन्द्र नेम्वाङ, अष्टलक्ष्मी शाक्य, रामबहादुर थापा ‘बादल’, विष्णुप्रसाद पौडेल र सुरेन्द्र पाण्डेको नाम प्रस्ताव गरेका थिए ।
ओलीले टोपबहादुर रायमाझी, रघुवीर महासेठ, छबिलाल बिक, लेखराज भट्ट, योगेश भट्टराई, गोकर्ण बिष्ट र पदमा अर्याललाई सचिवमा प्रस्ताव गरेपछि असन्तुष्टी व्यक्त गर्दै भीम आचार्य र टंक कार्कीले उम्मेदवारी दिएका छन् । विभिन्न पदमा उम्मेदवारी परेपछि मतदानको तयारी थालिएको छ ।