अन्तरपालिका कप फुटबलमा थाहा फाइनल प्रवेश

२३ मंसिर, हेटौंडा । हेटौंडामा जारी प्रथम अन्तरपालिका पुरुष फुटबल प्रतियोगितामा मकवानपुरको थाहा नगरपालिका फाइनल प्रवेश गरेको छ । बुधबार भएको पहिलो सेमीफाइनलमा भीमफेदी गाउँपालिकालाई हराउँदै थाहाले उपाधि भिडन्त पक्का गरेको हो ।
थाहा नगरपालिकाले भीमफेदी गाउँपालिकालाई २–१ गोल अन्तरले हराएको हो । थाहाको जितका लागी रोशन बल र सन्देश बलले एक एक गोल गरे । थाहाका रोशनले ३९ औं मिनेटमा गोल गर्दै टिमलाई अग्रता दिलाएका थिए । यस्तै दोस्रो हाफको पहिलो मिनेटमै थाहाका सन्देश बलले अग्रता दोब्बर पारे । 
भीमफेदीका सविन गोलेले खेलको ६७ औं मिनेटमा गोल गरेपनि टिमलाई हारबाट भने जोगाउन सकेनन् । भीमफेदीले गोल गर्ने केही सुन्दर मौकाहरु खेर फालेको थियो । खेलमा भीमफेदीका गोलरक्षक निशान थापा म्यान अफ द म्याच घोषित भए । 
फाइनल प्रवेशका लागि बिहीबार हेटौंडा उपमहानगरपालिका र बागमती गाउँपालिका खेल्नेछ । शनिबारसम्म सञ्चालन हुने प्रतियोगिताको विजेताले नगद २ लाख र उपविजेताले १ लाखसहित ट्रफी मेडल र प्रमाणपत्र प्राप्त गर्नेछ । 
यस्तै विधागत उत्कृष्ट खेलाडीहरुलाई समेत नगदसहित ट्रफीको व्यवस्था रहेको छ । जिल्ला समन्वय समिति मकवानपुरको आयोजना एवम् मकवानपुर जिल्ला खेलकुद विकास समितिको व्यवस्थापनमा सञ्चालन भैरहेको प्रतियोगितामा जिल्लाका १० वटै पालिकाको सहभागिता रहेको छ ।