परीक्षामा किर्ते गर्ने ६ जनाविरुद्ध  मुद्धा

१५ चैत, काठमाडौं । अख्तियार दुरुपयोग अनुसन्धान आयोगले त्रिभुवन विश्वविद्यालय सेवा आयोगका ६ जना विरुद्ध विशेष अदालतमा आरोपत्र दायर गरेको छ ।
आयोगले उनीहरुले परीक्षाको परिणाम फेरबदल गरेको भन्दै विशेष अदालतमा आरोपपत्र दायर गरेको हो । त्रिवि सेवा आयोग कार्यालयका प्राडा टेकनाथ ढकाल, सह–प्राध्यापक र तत्कालीन प्रशासन प्रमुखसहित ६ जनाविरुद्ध आरोपपत्र दायर भएको अख्तियार दुरुपयोग अनुसन्धान आयोगद्वारा जारी सूचनामा उल्लेख छ ।
२०७३ फागुन १८ मा प्रकाशित विज्ञापन नं. १८–०७३–०७४ सँग सम्बन्धित उपप्रशासक, पुस्तकालय अधिकृत, प्राविधिक अधिकृत (इन्जिनियर), प्राविधिक अधिकृत (कम्प्युटर), मुख्य प्राविधिक सहायक (कम्प्युटर), लेखा सहायक, पुस्तकालय सहायक र प्राविधिक सहायक (कम्प्युटर) पदको लिखित परीक्षामा अनियमितता र आर्थिक चलखेल भएको उजुरीपछि अख्तियारले अनुसन्धान थालेको थियो ।
सक्षम र उत्कृष्ट उम्मेदवारहरुलाई पाखा लगाई उत्तरपुस्तिका परीक्षण गर्ने क्रममा व्यापक अनियमितता भएको, प्राप्ताङक केरमेट गरेको, अंक थपघट गरी नतिजा फेरबदल गरेको भन्दै उजुरी परेको थियो । परीक्षकहरुले गलत मनसायका साथ केरमेट गरी जम्मा प्राप्तांकमा हेरफेर गरी मेरिट सूची फेरबदल गरेको समेत अख्तियारको अनुसन्धानबाट खुलेको छ ।