राज्यमन्त्री प्रजाको संघिय वन मन्त्रालयलाई ध्यानाकर्षणपत्र

१५ चैत,हेटाैंडा। चितवन राष्ट्रिय निकुञ्जले गत आइतबार चितवनको माडी नगरपालिका वडा नम्बर ९ स्थित कुसुम खोलामा बसोबास गर्दै आएका चेपाङ समुदायको घर भत्काउने तथा आगजनी गरेको प्रति बागमती प्रदेशका भाैतिक पूर्वाधार विकास राज्यमन्त्री सन्तबहादुर प्रजाले संघिय वन तथा वातावरण मन्त्रालयकाे ध्यानाकर्षण गराएका छन् । 

राज्यमन्त्री प्रजाले मंगलबार वन तथा वातावरण मन्त्रालयलाई ध्यानाकर्षण पत्र पठाउँदै सुकुम्बासी चेपाङकाे घर भत्काउने तथा आगजनी गरी घरबारबिहिन बनाउनु निन्दनीय भएकाे उल्लेख गरेका छन्।स्थानीय प्रशासन, प्रदेश र संघीय निकायसँग राय नलिई सरोकारवाला संघ संस्थाबीच छलफलसमेत नगरी मानव बस्तीमा गएर घर भत्काएर निकुञ्जले अमानवीय कार्य गरेकाे राज्यमन्त्री प्रजाले ध्यानाकर्षण पत्रमा उल्लेख गरेका छन् ।

'नेपालको संविधान २०७२ मा व्यबस्था भएको मानव स्वतन्त्रता, मौलिक हक, आदिबासी, जनजातिको आत्मनिर्णयको अधिकार, जल,जंगल, जमिनमाथि आदिवासीको अधिकार हनन् गर्दै निकुञ्ज प्रशासनले ज्याजति गरेको छ।सो विषयमा सरोकारवालाहरुबीच छलफल गरी घरबारबिहीनलाई तत्कालै आवासको व्यवस्था मिलाउन मन्त्रालयको ध्यानाकर्षण गराउँदछौं ।' मन्त्रालयलाई लेखेकाे ध्यानाकर्षण पत्रमा भनिएकाे छ ।  नागरिकको मौलिक हक हनन् हुने गरी कार्य गर्नेहरुमाथि आवश्यक छानविन गरी कारबाही तथा पीडितलाई क्षतिपूर्ति उपलब्ध गराउनसमेत माग गरिएकाे छ ।

त्यस स्थानमा बसोबास गर्ने नागरिकहरुमाथि पटकपटक अन्याय भइरहेको भन्दै सरकार र निकुञ्जबीच समस्याको समाधानको लागि गम्भीरतापूर्वक छलफल सुझाव दिइएकाे छ । निकुञ्जले घर भत्काइदिँदा १७ घरधुरी चेपाङ समुदाय घरबारबिहीन भएकाे भन्दै  उनीहरुलाई तत्काल बसोबासको व्यवस्था गरिदिन आग्रह गरिएकाे छ । घटनाप्रति दुःख व्यक्त गर्दै राज्यमन्त्री प्रजाले  बस्तीमा आगजनीको घटनाप्रति अत्यन्त दुःख व्यक्त गर्दै राज्यमन्त्री प्रजाले पीडित नागरिकलाई आवश्यक व्यवस्था गर्न वन मन्त्रालयलाई ध्यानाकर्षण पत्र मार्फत आग्रह गरेका छन् ।