पत्रकार महासंघको स्थापना दिवसमा हेटौंडामा प्रभातफेरी

१६ चैत,हेटौंडा । नेपाल पत्रकार महासंघको ६७ औ स्थापना दिबसका अवसरमा हेटौडामा प्रभातफेरी कार्यक्रम गरिएको छ ।
पत्रकार महासंघ मकवानपुर शाखाको आयोजनामा स्थापना दिबसका अबसरमा सबै संचारकर्मीबिच शुभकामना आदान प्रदान तथा प्रभातफेरी कार्यक्रम गरिएको हो । 
हेटौडाको सिमाचोकबाट निकालिएको प्रभातफेरी बुद्धचोक, पिपलबोट, मकवानपुर उद्योग बाणिज्य संघ हुँदै पुनः बुद्धचोकमा आएर कोण सभामा परिणत भएको थियो ।
कोणसभालाई सम्बोधन गर्दै नेपाल पत्रकार महासंघ मकवानपुरका अध्यक्ष मणीराज गौतमले पत्रकार महासंघका संस्थापक अध्यक्ष तथा पूर्व प्रधानमन्त्री कृष्ण प्रसाद भट्टराईको योगदानको स्मरण गर्दै दायित्वबोधका साथ पत्रकारितालाई नयाँ उचाईमा पुर्याउन सबैको भूमिका महत्वपूर्ण हुने बताए । उनले जिल्लामा विगतमा असहज अवस्थामा पत्रकारिता गर्ने अग्रजहरुका कारण अहिले जिल्लामा पत्रकारहरुको संख्या बढ्दो रहेको भन्दै उनले पत्रकार आचारसंहिताभित्र रहेर मर्यादित पत्रकारितालाई निरन्तरता दिनुपर्ने बताए ।
कार्यक्रममा पत्रकार महासंघ बागमती प्रदेशका संस्थापक अध्यक्ष प्रताप विष्ट, उपाध्यक्ष रुपेश दुलाल, सम्झना कार्की, महासचिव कृष्ण सुरु मगर पत्रकार महासंघ मकवानपुरका पूर्व अध्यक्षहरु राममणी दाहाल, भानुभक्त आचार्य, मकवानपुरका पत्रकार संगठन र मिडियामा कार्यरत संचारकर्मीहरुको सहभागिता रहेको थियो ।