देउवाको सपना पुरा: मिर्गौला, क्यान्सर र मेरुदण्डको पक्षघातका बिरामीलाई मासिक ५ हजार

१६ चैत, काठमाडौं । प्रधानमन्त्री शेरबहादुर देउवाले २०७४ सालमा दिने भनेको मिर्गौला, क्यान्सर र मेरुदण्डको पक्षघातका बिरामीलाई मासिक ५ हजार रूपैयाँ अब पाउने भएका छन् । देउवाले अघि बढाएको योजना त्यसपछिको सरकारले कार्यान्वयन नगरेको उपचार खर्चको योजना अब अघि बढ्ने भएको हो ।
२०७४ सालमा नै देउवा सरकारले मिर्गौला, क्यान्सर रोग, स्पाइनल प्यारालाइसिस भएका बिरामीलाई जिबीकोपार्जन भत्ता उपलव्ध गराउने सम्वन्धी कार्यविधि जारी गर्दै मासिक पाँच हजार रुपैयाँ दिने निर्णय गरेको थियो । प्रधानमन्त्री शेरबहादुर देउवाले राष्ट्रिय ट्रमा सेन्टरमा पुगेर यसको शुरूवात गरेपनि सरकार परिवर्तन भएपछि कार्यान्वयन भएको थिएन । अहिले नयाँ कार्यविधि बनाएपछि मिर्गौला, क्यान्सर र मेरुदण्डको पक्षघात भएका बिरामीले यसै महिना देखि मासिक ५ हजार रुपैयाँको दरले उपचार खर्च पाउने भएका छन् ।
 स्वास्थ्य मन्त्रालयले तयार पारेको ‘मिर्गौला प्रत्यारोपण गरेका, डायलाईसिस गरिरहेका, क्यान्सर रोगी र मेरुदण्ड पक्षघातका बिरामीलाई औषधि उपचार बापत खर्च उपलव्ध गराउने कार्यविधि-२०७८’ स्विकृत भएकाले अब उपचार खर्च वितरण गरिने भएको छ ।
कार्यविधि अनुसार सरकारले तोकेको मासिक पाँच हजार रुपेयाँका दरले तीन तीन महिनाको अन्तिम दिन स्थानीय तहले लाभग्राहीको बैंक खातामा रकम जम्मा गरिदिने र स्थानीय तहलाई मन्त्रालयले सोधभर्ना दिनेछ । राज्यको पेन्सन र सुरक्षाभत्ता जस्ता सुविधा लिनेले भने रकम पाउने छैन ।