हेटौंडा २ मा कांग्रेसको ज्येष्ठ नागरिकलाई सम्मान

१८ चैत, हेटौंडा । नेपाली कांग्रेस श्रृष्टी टोल समिति हेटौंडा २ ले बिहीबार वडा भित्र रहेका ज्येष्ठ नागरिकहरुलाई एक कार्यक्रमकाबीच सम्मान गरेको छ । वडामा रहेका ७५ वर्ष भन्दा माथि उमेर समूहका ज्येष्ठ नागरिकहरुलाई सम्मान गरेको हो ।
नेपाली कांग्रेसको घरघर जाउँ कांग्रेस जिताउँ अभियान अन्तरगत बिहिबार एक कार्यक्रमको आयोजना गरी वडाभित्र रहेका ४८ जना ज्येष्ठ नागरिकहरुलाई दोसल्ला ओढाएर सम्मान गरेको समितिकी अध्यक्ष कल्पना रिजालले जानकारी दिईन । 
अध्यक्ष रिजालको अध्यक्षतामा भएको कार्यक्रममा नेपाली कांग्रेस केन्द्रीय सहमहामन्त्री महालक्ष्मी उपाध्याय डीनाको प्रमुख आतिथ्यता रहेको थियो । कार्यक्रममा सहमहामन्त्री डीनाले ज्येष्ठ नागरिकहरुको मायाँ र आशिर्वाद सदैव आवश्यक रहेको बताइन् । समाजमा भएका गतिविधिहरुलाई यहाँसम्म ल्याईपु¥याउने काम ज्येष्ठ नागरिकहरुकै भएका कारण उहाँहरुलाई सदैव सम्मान गर्नुपर्ने उनले बताईन् । 
उनले स्थानीय तहको निर्वाचनको मिति नजिक आईसकेको बताउँदै कांग्रेस जिताउन सबैले आफ्नो क्षेत्रबाट भूमिका खेल्नुपर्नेमा समेत जोड दिईन । कांग्रेसको नेतृत्वमा देशमा ठूलाठुला परिवर्तनहरु भएको बताउँदै उनले एमालले जस्तो भ्रमको खेती कांग्रेसले नगर्ने तर्क प्रस्तुत गरिन् । 
कार्यक्रममा नेपाली कांग्रेस मकवानपुरका जिल्ला सदस्य आनन्दराम पराजुली, इश्वर पण्डित, २ नम्बर वडा सभापति भवसागर श्रेष्ठ लगायत कांग्रेस नेता तथा कार्यकर्ताहरुको उपस्थिति रहेको थियो ।