जनकपुर जयनगर रेल सेवा आजबाट नियमित सञ्चालन हुने

२० चैत, हेटौंडा । प्रधानमन्त्री शेरबहादुर देउवा र भारतीय समकक्षी नरेन्द्र मोदीले संयुक्त रुपमा उद्घटन गरेपछि धनुषाको कुर्थादेखि भारतको जयनगरसम्म नियमित रेल सेवा सुरू भएको छ । 
भारत भ्रमणमा रहेका प्रधानमन्त्री शेरबहादुर देउवाले शनिवार भारतीय समकक्षी नरेन्द्र मोदीसँग मिलेर संयुक्त रुपमा रेल सेवाको उद्घाटन गरेका हुन्  । 
नेपालमा रेल सेवा सञ्चालनका लागि दुई सेट रेल खरिद गरिएको डेढवर्षपछि रेल सेवा सञ्चालनमा आएको हो । नेपाल रेल्वे कम्पनीका महाप्रवन्धक निरञ्जन झाका अनुसार प्रधानमन्त्रीद्वयले झण्डा हल्लाएपछि जयनगरबाट जनकपुरका लागि रेल गुडेको थियो ।
उद्घाटनको अवसरमा हिजो यात्रुले निःशुल्क रेल चढ्न पाएपनि आजदेखि भने कुर्था–जयनगरसम्मको कुल ३४ दशमलव ५ किलोमिटरको यात्राका लागि सामान्य सिटका लागि ९० रूपैयाँ र वातावरण अनुकूलित (एसि) सिट सुविधातर्फ ४५० रूपैयाँ तिर्नुपर्ने छ ।
जनकपुरधामबाट भने जयनगरका लागि समान्य टिकट ७० रूपैयाँ र एसिमा ३७० कायम गरिएको छ । आजदेखि दैनिक आउने र जाने गरी रेल दुईपटक चल्नेछ । बिहान साढे ८ बजे जयनगरबाट कुर्थाका लागि रेल चल्नेछ ।
२०७७ असोज २ गते केपी शर्मा ओलीको पालमा भारतीय कोकंण रेलवे कम्पनीसँग ८४ करोड ६५ लाख रुपैयाँमा रेल खरिद गरिएको थियो । खरिद गरिएर लामो समयसम्म त्रिपाल ओढाएर राखिएको रेल सञ्चालनका लागी देउवा सरकारले रेल सञ्चालनका लागी प्रकृया पुरागरेपछि केहीदिन अघिमात्रै रेलको परिक्षण सञ्चालन गरिएको थियो ।