हेटौंडाका २ व्यापारी अनुगमनको फन्दामा, जरिवाना गरियो

२२ चैत, हेटौंडा । हेटौंडामा २ व्यापारी अनुगमनको फन्दामा परेका छन् । संयुक्त बजार अनुगमन टोलीले हेटौंडा–२ मा ५ वटा पसलको अनुगमन गरेकोमा २ व्यापारी फन्दामा परेका छन् । 
कारवाहीमा पर्नेमा बिनोदमान श्रेष्ठले संचालन गरेको विनोद किराना पसल र संदिप साहले संचालन गरेको श्याम स्टोर रहेका छन् । ति पसलले बिल बिजक जारी नगरेकोले पाईएको छ । टोलीले विनोद किराना पसललाई १० हजार रुपैंया र श्याम स्टोरलाई २० हजार रुपैंया जरिवाना गर्दै बिल बिजक जारी गर्न र तोकेको मूल्य भन्दा बढि मूल्य नलिन मौखिक निर्देशन दिएको मकवानपुरका सहायक प्रमुख जिल्ला अधिकारी बद्रीनाथ गैह्रेले जानकारी दिए । अनुगमन टोलीले हरिप्रसाद खतिवडाले संचालन गरेको एचपि सप्लायर्स, कान्छि खतिवडाले संचालन गरेको सुमित्रा किराना स्टोर र कृष्ण अग्रवालले संचालन गरेको पसल समेत अनुगमन गरेको थियो ।
अनुगमनमा गैह्रेको नेतृत्वमा खाद्य प्रविधि तथा गुण नियन्त्रण कार्यालय, घरेलु तथा साना उद्योग कार्यालय, हेटौंडा उपमहानगरपालिका, जिल्ला प्रहरी कार्यालय मकवानपुर, मकवानपुर उद्योग बाणिज्य संघ र संचारकर्मीको उपस्थिति रहेको प्रशासनको दावी छ । चैत २० गते अनुगमन गरेको भनिएपनि जानकारी भने २ दिनपछि मंगलबार जानकारी दिएको छ ।