मकवानपुरमा बाम बर्चश्व

हेटौँडा, २४ मंसिर । मंसिर २१ गते सम्पन्न प्रतिनिधि एवं प्रदेश सभाको निर्वाचनमा मकवानपुरमा बाम गठबन्धनले बर्चश्व कायम गरेको छ ।
२ प्रतिनिधिसभा र ४ प्रदेश सभा रहेको मकवानपुरमा बाम गठबन्धनले प्रतिनिधिसभाको दुबै क्षेत्र र प्रदेशर्फको ३ वटा क्षेत्रमा विजय हासिल गरेको छ । प्रतिनिधिसभा १ मा राप्रपाका अध्यक्ष कमल थापालाई पराजित गर्दै बाम गठबन्धनको तर्फबाट नेकपा एमालेका कृष्णप्रसाद दाहाल विजयी भए । प्रतिनिधिसभा २ तर्फ बाम गठबन्धनका उम्मेदवार विरोध खतिवडाले लोकतान्त्रिक गठबन्धनको तर्फबाट नेपाली कांग्रेसका उम्मेदवार महालक्ष्मी उपाध्याय डिनालाई पराजित गरे ।

प्रदेशतर्फ बाम गठबन्धनका उम्मेदरहरु प्रतिनिधिसभा १ को प्रदेश १ मा नेकपा माओवादीका प्रेमबहादुर पुलामीले नेपाली कांग्रेसका धर्मराज लामिछानेलाई पराजित गरेका छन् । प्रदेश २ मा नेकपा एमालेका डोरमणी पौडेलले नेपाली कांग्रेसका अशोकराज शाक्यलाई पराजित गर्दा प्रतिनिधिसभा २ को प्रदेश १ मा नेकपा माओवादीका कुमारी मोक्तानले नेपाली कांग्रेसका यतिराज सापकोटालाई पराजित गरे ।

प्रतिनिधिसभा मकवानपुर क्षेत्र नम्बर २ को प्रदेश २ मा लोकतान्त्रिक गठबन्धनले जितेपछि लालकिल्ला बनाउने बाम गठबन्धनको लक्ष्य भने पुरा हुन पाएन । लोकतान्त्रिक गठबन्धनका तर्फबाट नेपाली कांग्रेसका उम्मेदवार ईन्द्रबहादुर बानियाँले एमालेका राजाराम स्यांतानलाई पराजित गरे । उपप्रधानमन्त्री समेत रहेका राप्रपाका अध्यक्ष कमल थापाको पराजय र लालकिल्ला हुनबाट रोक्ने पूर्व गृहराज्यमन्त्री समेत रहेका नेपाली कांग्रेस मकवानपुर सभापति ईन्द्रबहादुर बानियाँको विजय मकवानपुरमा चर्चाको विषय बनेको छ ।