बकैयाका ११ जना सुकुम्बासीले पाए लापूर्जा

६ साउन, हेटौंडा । मकवानपुरको बकैया गाउँपालिकाका एघारजना भूमिहीनले शनिवार जग्गाधनी लालपूर्जा पाएका छन् । पालिकाको वडा नम्बर ५ का एघारजना भूमिहीन सुकम्बासीले लालपूर्जा पाएका हुन् ।
लालपूर्जा वितरण कार्यक्रमका प्रमुख अतिथि रहेका बागमती प्रदेशका मुख्यमन्त्री शालिकराम जम्कट्टेलले बकैया–५ का शुक्रबहादुर भुलुन, निरमाया भुलुन, फुलमाया भुलुन, सुवास कुमार बि.क, शुसिला विक, बाबुलाल थिङ, कमल बहादुर थिङ, कान्छीमाया पुलामी, हस्तबहादुर थिङ, लक्ष्मण थापा र विनोद वाइवालाई लालपूर्जा वितरण गरे ।
लालपूर्जा वितरण गर्दै मुख्यमन्त्री जम्कट्टेलले सरकार अव्यवस्थित बसोबासी र भूमिहीन सुकुम्बासी समस्या समाधानको लागी गम्भिर रहेको बताए । 
यस्तै गाउँपालिकाका अध्यक्ष धर्मराज लामिछानेले हाललाई लगत समाबेश भएका पालिकाका ६४ मध्ये एघार परिवारको मात्रै लालपुर्जा मुद्र्रण भएकोले एघारजनालाई वितरण गरिएको जानकारी दिए । बाँकी भूमिहीनले पनि छिट्टै लालपूर्जा पाउँने अध्यक्ष लामिछानले बताए ।
बकैया गाउँपालिका ५ राजद्मारमा भएको लालपूर्जा वितरण कार्यक्रममा प्रदेशका सामजिक बिकास मन्त्री कुमारी मोक्तान, प्रदेश सदस्य प्रेम बहादुर पुलामी, लक्ष्मी श्रेष्ठ, भुमी आयोग मकवानपुरका अध्यक्ष बिष्णु दाहाल लगाएतको उपस्थिति रहेको थियो ।