बालविवाह रोक्न मनहरीका अध्यक्ष कालाखेति आफैं एक्सनमा

१९ माघ, हेटौंडा । मकवानपुरको मनहरी गाउँपालिकाका जनप्रतिनिधिको सक्रियतामा हुन लागेको बाल बालविवाह रोकिएको छ । मनहरी-५ की १६ बर्षीया बालिकासंग उदयपुरको त्रियुगा नगरपालिका-८ का २१ बर्षीय युवकसंग विवाह हुन लागेको जानकारी पछि मनहरीका जनप्रतिनिधि र सरोकारवाला निकायको सक्रियतामा विवाह रोकिएको हो ।
माघ १४ गते गाउँपालिका अध्यक्ष रञ्जन कालाखेतीको नेतृत्वमा सामाजिक विकास समितिका संयोजक अनन्त प्रकाश अर्याल, सिविन नेपाल मकवानपुरका संयोजक झविन्द्र ज्ञवाली, बाल अधिकार समिति मनहरीका सदस्यहरु देवकी ढुङ्गाना, अस्मिता कार्की, वाल सन्जालका सल्लाहकार अन्जन सापकोटा उदयपुर गएर त्यहाँका जनप्रतिनिधिसँग समन्वय गरी घरमा पुगेर परिवारलाई सम्झाई बुझाई गरेर बालिकालाई माघ १८ गते घर फर्काइएको थियो ।
सामाजिक सञ्चालबाट प्रेम सम्बन्धमा पुगेका उनीहरु मनहरीबाट पुस २५ गते भागेर उदयपुर पुगेका थिए । २७ गते मनहरी बाल सञ्जालले जानकारी पाएर वडा र पालिकामा ध्यानाकर्षण पत्र बुझाएपछि उहाँहरुको खोजी भएको थियो । उमेर नपुगेकाले उमेर पुगेपछि मात्रै विवाह गर्न परिवारले बालिकालाई बुझाउने प्रयास गरेपनि बालिकाले आत्महत्या गर्ने धम्की दिएको र पछि मनहरीबाट उदयपुर भागेको पारिवारीक स्रोतले जानकारी दिएको छ । बालिका बाल क्लवल सञ्जालको सदस्य समेत रहेकी थिइन । बालिकाको आमा मनहरी गाउँपालिका पूर्व कार्यपालिका सदस्य समेत हुन् ।
नेपालमा २० वर्षभन्दा कम उमेरमा गरिने विवाहलाई कानुनले अवैधानिक मानेको छ । नेपालको संविधानमा केटा वा केटी २० वर्ष उमेर नपुगी विवाह गर्ने/गराउने सबै पक्षलाई ३० हजार रुपैयाँसम्म जरिवाना र तीन वर्षसम्मको जेल सजाय हुने व्यवस्था छ । पालिकामा चालु आर्थिक बर्षमा १४ वटा बालविवाह हुन लागेकोमा ११ वटा बालविवाह रोक्न सफल भएको गाउँपालिका अध्यक्ष रञ्जन कालाखेतीले जानकारी दिए ।