हाँडीखोलामा कोल्ड स्टोर बन्ने, गाउँपालिका अध्यक्षले गरे शिलान्यास

१५ फागुन, मनहरी । मकवानपुरको मनहरी गाउँपालिकाले हाँडीखोलामा कोल्ड स्टोर निर्माण सुरु गरेको छ । उत्पादित तरकारी भण्डारण गरी उचित समयमा बिक्री गर्न सकिने गरि मनहरी गाउँपालिकाले करिब सवा ६ करोडभन्दा बढी लगानीमा ३ नम्बर वडामा निर्माण हुन लागेको कोल्ड स्टोरको सोमबार शिलान्यास गरिएको छ । 
कोल्ड स्टोरको गाउँपालिकाका अध्यक्ष रन्जन कालाखेती, उपाध्यक्ष सीता पुलामी मगरसहित वडाध्यक्षहरुको उपस्थितिमा शिलान्यास गरिएको हो । हिमालयन नमोवुद्ध जेभीले ६ करोड २८ लाख ४५ हजारमा कोल्ड स्टोर निर्माण गर्ने सम्झौता गरेको छ । निर्माण कम्पनीले २४ महिनाभित्र कोल्ड स्टोर निर्माण सक्ने प्रतिवद्धता जनाएको छ । 
तकारीको पकेट क्षेत्र मानिने हाँडीखोलामा कोल्ड स्टोर निर्माण भएपछि त्यस क्षेत्रमा उत्पादित तरकारीको भण्डारण गर्ने र उचित मूल्य प्राप्त भएपछि मात्रै बिक्री गर्ने सुविधा किसानले पाउनेछन् । कोल्ड स्टोरको क्षमता चार सय मेट्रिकटन हुनेछ । 
शिलान्यास कार्यक्रममा बोल्दै गाउँपालिका अध्यक्ष रन्जन कालाखेतीले साविक हाँडिखोलाबासीका लागि कोल्ड स्टोर गौरवको आयोजना भएको बताए । निर्वाचनमा आफूले पहिलो एजेण्डाको रुपमा कोल्ड स्टोर निर्माणलाई अघि सारेको स्मरण गर्दै कालाखेतीले सो योजना साकार हुन लागेकोमा खुसी व्यक्त गरे । 
गाउँपालिकाकी उपाध्यक्ष सीता पुलामी मगरले कोल्ड स्टोर निर्माण पश्चात हाँडिखोलाका तरकारी उत्पादक किसानलाई ठूलो लाभ मिल्ने विश्वास व्यक्त गरिन् । किसानले उब्जाएको तरकारीले मूल्य नपाएको अवस्थामा कोल्ड स्टोरमा राखी उचित मूल्य आएपछि बिक्री गर्न सक्ने सुविधा किसानले पाउने पुलामीले बताइन् । 
मनहरी ३ का वडाअध्यक्ष अनन्त प्रकाश अर्यालले निर्माण कम्पनीलाई समयमा काम सम्पन्न गर्न आफुले सहजीकरण गर्ने प्रतिवद्धता व्यक्त गरे । शिलान्यास कार्यक्रममा वडा नं १ का वडाअध्यक्ष शिवप्रसाद खनाल, ५ का वडा अध्यक्ष दिपेन्द्र अधिकारी, ९ का वडाअध्यक्ष राजकुमार श्रेष्ठ, गाउँपालिकाका निमित्त प्रमुख प्रशासकीय अधिकृत राजेन्द्र भट्टराई लगायतको उपस्थिति रहेको थियो । कोल्ड स्टोर निर्माणका लागि स्थानीय गणेश कुमारी उप्रेतीले १० धुर जग्गा उपलब्ध गराएकी हुन् ।