छतिवनमा हिज्जे प्रतियोगिता र किशोरी शिक्षा

२९ भदौ, हेटौँडा । राष्ट्रिय बालदिवसको अवसरमा पूर्वी मकवानपुरको छतिवनमा अंग्रेजी हिज्जे प्रतियोगिता र किशोरीहरुका लागि तालिम सम्पन्न भएको छ । 
निमावि स्तरीय हिज्जे प्रतियोगतिमा महेन्द्र उच्च मावि छतिवनका प्रवेश चौलागाईं र कृष्मा घिमिरे प्रथम, जनक माविका सत्यम् सुवेदी र रचना स्याङ्तान द्वितिय, बकैया ठाकुर निमाविका अजिव स्याङ्तान र रोजिना गोले तृतीय,  कर्मप्राप्ति माविका हिमाल घतानी र यमुना राना मगरले सान्त्वना पुरस्कार प्राप्त गरेका छन् । छतिवन गाविसका ८ विद्यालयका विद्यार्थीको सहभागिता रहेको थियो ।

सिविन बालहेल्पलाइन, बालसंरक्षण समिति, बुद्ध युवा क्लव, बुद्ध बाल क्लव छतिवनको संयुक्त आयोजनामा भएको कार्यक्रम महिला तथा बालबालिका कार्यालयकी महिला विकास निरिक्षक दुर्गा घिमिरेको प्रमुख आतिथ्यता एवं बुद्ध युवा क्लबका अध्यक्ष विजय लामाको अध्यक्षतामा भएको कार्यक्रममा सिविन बाल हेल्पलाइनका जिल्ला संयोजक झबिन्द्र ज्ञवाली, बाल संरक्षण समितिका अध्यक्ष नवराज चौंलागाईं, बुद्ध उच्च माध्यमिक विद्यालयका प्रधानाध्यापक छविलाल विक लगायतको उपस्थिति रहेको थियो ।  

यस्तै, छतिवनमा किशोरीहरुको लागि जीवन उपयोगीमा आधारित ३ दिने शिक्षा समेत शुरु भएको छ । बालविवाह, किशोरावस्थामा हुने परिवर्तन, यौन शिक्षा तथा प्रजनन शिक्षा, गर्भपतन, बालअधिकार, बालश्रम तथा दायित्वको बारेमा जनस्वास्थ्य कार्यालयका सुपेन्द्र कार्की र सिविन नेपालका सम्झना अधिकारीले सहजीकरण गरेका छन् । सिविनले ११ र १२ अध्ययनरत  ७ छात्रालाई छात्रवृत्ति वितरण गरेको छ । 

तस्विर : सुपेन्द्र कार्कीको फेसबुक