मुख्यमन्त्री बानियाँद्धारा राक्सिराङको नवनिर्मित भवनको उद्घाटन

२३ पुस,हेटौँडा । मकवानपुरको राक्सिराङ गाउँपालिकाको नवनिर्मित भवनको उद्घाटन गरिएको छ । गाउँपालिकाको नवनिर्मित भवनको बुधबार एक समारोहका बिच बागमती प्रदेशका मुख्यमन्त्री इन्द्रबहादुर बानियाँले उद्घाटन गरेका हुन् ।

बानियाँले गाउँपालिकाको १९ औँ हिउँदे अधिवेशन उद्घाटनसँगै गाउँपालिकाको नवनिर्मित भवनको पनि उद्घाटन गरेका हुन् । उद्घाटन कार्यक्रमलाई सम्बोधन गर्दै मुख्यमन्त्री बानियाँले दोस्रो जनआन्दोलन पछि प्राप्त संघीयताले राक्सिराङ जस्ता दुर्गम गाउँपालिकाको मुहार फेर्न सफल भएको बताएका छन् ।  उनले राक्सिराङ गाउँपालिका भित्रको स्थानीय उत्पादन कृषि उपज र घरेलु उत्पादनलाई प्रोत्साहन गर्ने बागमती प्रदेश सरकारले आवश्यक कदम चाल्ने बताएका छन् । उनले गाउँपालिकाले नवनिर्मित भवनबाट दिने सेवा चुस्त दुरुस्त रहने कुरामा आफु विश्वस्त रहेको बताएका छन् ।  
गाउँपालिका अध्यक्ष राजकुमार मल्लको सभाध्यक्षता सम्पन्न कार्यक्रमकार्यक्रममा बागमती प्रदेशसभा सदस्य  कुमारी मोक्तान, प्रदेशसभा सदस्य भारती पाठक, जिल्ला समन्वय समिति मकवानपुरका प्रमुख ललित घलान, कैलाश गाउँपालिकाका अध्यक्ष लोकबहादुर मुक्तान लगायतले मन्तव्य व्यक्त गरेका थिए । 

फोटोः पत्रकार शिव कुमार रिजालको फेसबुकबाट