हात्तिलेटमा कालोपत्रे गरेको भोलिपल्टै उक्किएपछि स्थानीय आक्रोशित (भिडियोसहित)

३० असार, हेटौँडा । समय छँदा काम गर्न नआएको निर्माण व्यवसायीले केही दिन अघिबाट शुरु गरेको कालोपत्रे उक्किएपछि हेटौँडा–६ हात्तिलेटका स्थानीय आक्रोशित भएका छन् । 
चौघडा–रंगशाला सडक अन्तरगत शुक्रबार साँझ गरेको हात्तिलेट क्षेत्रको कालोपत्रे शनिबार उक्किन थालेपछि स्थानीय आक्रोशित भएका हुन् । उनीहरुले गुणस्तरीय काम गर्नुपर्ने भन्दै सम्बन्धित निकायको ध्यानाकर्षण हुनुपर्ने बताएका छन् । ‘माटोमाथि नै कालोपत्रेका कारण यस्तो भएको हो ।’–एक स्थानीयले भने । हेटौँडा ६ नम्बर वडा कार्यालयले काम नगरेको भन्दै कारवाहीका लागि जिल्ला प्रशासन कार्यालय मकवानपुरमा पत्राचार गरेपछि केही दिन अघि काम थालेको शुभेच्छा निर्माण सेवाले कमसल काम गरेको उनीहरुको भनाई छ । 
‘हिजो साँझ गरेको पिच आज विहानै उक्किन थालेको छ ।’–स्थानीय प्रतिक्षा चौलागाईले भनिन्–‘तर हेटौँडा उपनगरपालिकाका इन्जिनियरहरुले वास्ता गरेका छैनन् ।’ दिनदिनै पानी परिरहेको अवस्थामा निर्माण व्यवसायीले चिसो जमिनमा कालोपत्र गरिरहेको उनीहरुको भनाई छ । भिजेको जमिनमा कालोपत्रे गर्दा राज्यको लगानी खेर जाने तर कालोपत्रे नटिक्ने उनीहरुको भनाई छ । निर्माण व्यवसायीले क्रसिङ गरेको गिटि नहाली कमसल गिटि र बालुवा छरेर खाल्डो पुरेको पनि स्थानीयको गुनासो छ । 
हेटौँडा वडा नम्बर ६ का वडा अध्यक्ष अर्जुनप्रसाद चौलागाईले कालोपत्रेबारे गुनासो आएपछि उपमहानगरपालिकाका इन्जिनियरसहित आफुले निगरानी बढाएको बताए । जनप्रतिनिधिहरुको निगरानी र स्थानीयको दवावपछि उक्किएको ठाउँमा निर्माण व्यवसायी पक्षले टालेर गएपनि काम गुणस्तरीय नभएको स्थानीयको भनाई छ । आव ०७३/०७४ को बजेट अनुसार ठेक्का लिएको शुभेच्छा निर्माण सेवाले २०७४ बैशाख अघि भएको सम्झौता समाप्त भई २०७५ असार समान्तसम्मका लागि सम्झौताको म्याद थप भएको थियो । 
तर असार सकिन लाग्दा पनि निर्माण व्यवसायीले काम नगरेको भन्दै भुक्तानी रोक्का गरी छिटो भन्दा छिटो काम सम्पन्न गराउन आवश्यक प्रकृया अघि बढाउन जिल्ला प्रशासन कार्यालयलाई पत्राचार गरिएको थियो । ५५ लाख रुपैँयाको लागतमा निर्माण हुन लागेको सडकको लम्बाई २.४ किलोमिटर छ ।