विवादका कारण छतिवन-श्रीपुर सडक निर्माण रोकियो 

File Photo

२२ साउन, हेटौँडा । पूर्वी मकवानपुरको बकैया गाँउपालीका हुँदै बाग्मति गाउँपालिका जाने धरान–चतरा मार्गमा सवारी आवागमनमा समस्या उत्पन्न भएको छ । 
निर्माणाधिन सडकको श्रीपुरस्थित जंगलमा नेपाली सेना र सडक विभागको अवरोधपछि सडक स्तरिकरण नहुँदा सवारी आवागमनमा समस्या उत्पन्न भएको हो । दैनिक साना ठुला गरी ५० भन्दा बढी यात्रू तथा मालबाहक सवारी गुड्ने यो सडकमा फुर्केचौर–श्रीपुर खण्ड बर्षाका कारण क्षतिग्रस्त भएपनि मर्मत नभएको स्थानीयको गुनासो छ । नेपाली सेना, सडक विभाग र निर्माण कम्पनीको नीतिगत विवादका कारण सडक स्तरिकरण हुन नसकेको छतिवनका स्थानीय बताउँछन् । 
राष्ट्रिय गौरवको आयोजनाको रुपमा रहेको फाष्ट ट्रयाक नेपाली सेनाको विकास निर्देशनालयले निर्माण तथा स्तरिकरण गरिरहेको छ । तर फाष्ट ट्रयाक र धरान–चतरा सडक वारपार हुने विन्दुमा सडक विभागले समेत निर्माण कम्पनीलाई काम गर्न रोक लगाएपछि सडक निर्माण रोकिएको छ । धरान–चतरा सडकको निर्माणको काम गरिरहेको कालिका कन्स्ट्रक्सनका कालिकाका प्रवन्ध निर्देशक ठाकुर ढकालले सडक विभागको आदेशका कारण फुर्केचौर–श्रीपुर खण्डको जङ्गल क्षेत्रमा काम गर्न नसकेको बताए । 
बकैया–५ का वडा अध्यक्ष शेरमान घलान राज्य संयन्त्रबीचको नीतिगत विवादले यो सडकबाट आवतजावत गर्ने यात्रु जोखिमपूर्ण ढंगले यात्रा गर्न बाध्य भएको बताउँछन् । धरानदेखि हेटौंडासम्म ३ सय ११ किलोमिटरको सिन्धुली देखि हेटौंडासम्मको यो सडकको पश्चिम खण्डको ११४ किलोमिटिर सडक कालिका कन्स्ट्रक्शनले निर्माण गरिरहेको छ ।
(पत्रकार यादव चौलागाईको सहयोगमा)