कारखाना श्रमिक संघद्वारा अान्दोलन घोषणा

८ कार्तिक, हेटौंडा । सरकारले ल्याउन लागेको नयाँ अौद्योगिक व्यवसाय एेनमा मजदुर हित विपरितका प्रावधान राखेको भन्दै नेपाल कारखाना श्रमिक संघले अान्दोलन घोषणा गरेको छ । 

संघको हेटौंडामा सम्पन्न केन्द्रीय कार्यसमिति बैठकले संसदबाट असोज १२ गते पारित अौद्योगिक व्यवसाय सम्बन्धी कानूनलाई संशोधन तथा एकीकरण गर्न बनेको विधेयक २०७१ को दफा ४७ को उपदफा ६ र ७ संगठन स्वतन्त्रता र सामुहिक सौदावाजीको भावना विपरित भएको भन्दै विरोध गरेको छ । बैठकले बन्द हड्ताल र नो वर्क नो पे जस्ता विवादित विषयलाई सरोकारवालाहरूसंग छलफल नगरि एकपक्षीय ढंगबाट एेनमा राखिएको भन्दै अापत्ति जनाएको छ ।

मंगलबार हेटौंडामा भएको पत्रकार सम्मेलनमा संघका केन्द्रीय अध्यक्ष धिरेन्द्रकुमार सिंहले एेनको दफा ४७ को उपदफा ६ र ७ मा रहेको श्रमिक विरोधी विषय खारेजीको माग गर्दै कार्तिक १८ गते संघका जिल्ला समितिले श्रम कार्यालयमार्फत श्रममन्त्रीलाई ज्ञापनपत्र बुझाउने बताए ।

त्यसैगरी, मंसिर १ गते अौद्योगिक प्रतिष्ठानका ईकाई समिति र जिल्ला समितिले जिल्ला प्रशासन कार्यालयमार्फत प्रधानमन्त्री र उद्योगमन्त्रीलाई ज्ञापनपत्र बुझाउने, ८ गते सम्पूर्ण अौद्योगिक प्रतिष्ठानमा कालो व्यानर राख्ने निर्णय भएको छ । माग पूरा नभएर उद्योग प्रतिष्ठान बन्द गर्ने चेतावनी समेत संघको छ ।

बैठकले बन्द तथा रूग्ण उद्योग तत्काल संचालन गर्न र बन्द उद्योग एवं प्रतिष्ठानमा कार्यरत श्रमिकहरूको तलव तथा सुविधा उपलव्ध गराउन सरकार र व्यवस्थापनलाई दवाव दिने, ५ बर्षदेखि सामाजिक सुरक्षा कोष बापत कट्टा गरेको १% रकम प्रयोगका लागि सामाजिक सुरक्षा एेन पारितका लागि सम्बन्धित निकायसंग छलफल, दवाव र लविङ गर्ने समेत निर्णय गरेको छ । 

बैठकले अान्दोलन संचालन गर्न अध्यक्ष धिरेन्द्रकुमार सिंह संयोजक र सुरेश भगत, टेकेन्द्र पौडेल, विजय पौडेल, लक्ष्मणप्रसाद भट्टराई, प्रतिमा शाह र यमबहादुर श्रेष्ठ रहेको ७ सदस्यीय समिति र नयाँ संविधान अनुसार विधान संशोधनका लागि लक्ष्मणप्रसाद भट्टराई संयोजक, यम श्रेष्ठ, चन्दन झा, प्रेमशंकर पाण्डे र अनिल बस्ताकोटी सदस्य रहेको ५ सदस्यीय विधान संशोधन समिति गठन गरेको छ । 

पत्रकार सम्मेलनमा कारखाना श्रमिक संघका पदाधिकारी, ट्रेड युनियन कांग्रेसका पदाधिकारीको सहभागिता रहेको थियो ।