गजल मञ्च मकवानपुरले मनायो गजल यात्राको १५० औं शृङ्खला 

७पुस, हेटौँडा। गजल यात्राको १५० औं शृङ्खला पुगेको अवसरमा गजल मञ्च मकवानपुरले शनिबार हेटौंडामा विशेष कार्यक्रमको आयोजना गरी गजल यात्राको १५० औं शृङ्खला मनाएको छ । गजल मञ्च मकवानपुरका अध्यक्ष देवराज तिवारीको सभाध्यक्षतामा भएको कार्यक्रममा साहित्यको क्षेत्रमा योगदान पु्याउने नवलपरासीका गजलकार डाक्टर श्याम न्यौपानेलाई सम्मान गर्नुका साथै  मकवानपु्रका साहित्यकारहरुले आफ्ना गजल बाचन गरेका थिए  । 
कार्यक्रममा साहित्यकारहरु आरसी रिजाल, निमेष निखिल, देवराज खरेल, ह्याग्रीव आचार्य, पुरुषोत्तम आचार्य, अनिता न्यौपाने, नेपाल पत्रकार महासंघ मकवानपुरका उपाध्यक्ष कुमार अधिकारी लगायतको उपस्थिति रहेको थियो । कार्यक्रममा सम्मानित भएका डाक्टर न्यौपानेले आफ्ना विभिन्न शिर्षकका गजलहरु प्रस्तुत गरेका थिए ।
त्यसैगरी शनिबारनै हेटौंडामा मकवानपुरे साहित्यकार मुक्तान थेबाका २ वटा कृति अखण्ड आलाप र काकलिङको गृह बिमोचन तथा परिचर्चा भएको छ। साहित्यकार थेवाका पिता इन्द्र बहादुर मुक्तानको प्रमुख आतिथ्यतामा सम्पन्न कार्यक्रममा साहित्यकारहरु निमेष निखिल, प्रदीप बालाचन, यस लामाले कृतिमाथि परिचर्चा गरेका थिए ।  प्रगतिशिल लेखक सँघका अध्यक्ष पुरुषोत्तम आचार्यको सभाध्यक्षतामा भएको कार्यक्रममा ३ नं प्रदेशसभा सदस्य प्रेम बहादुर पुलामी, समाजसेवी सिताराम बर्तौला, लगायत विभिन्न साहित्यकार तथा साहित्यप्रेमीहरुको सहभागिता थियो ।