समृद्ध नेपालका लागि कार्यशैली बदल्नु जरुरी : मूख्यमन्त्री पौडेल

१३ पुस, हेटौँडा । प्रदेश नम्बर ३ का मूख्यमन्त्री डोरमणी पौडेलले समृद्ध नेपालको सपना पुरा गर्न पुरानो कार्यशैलीलाई बदल्नु जरुरी रहेको बताए ।

प्रदेश नीति तथा योजना आयोगले शुक्रबार हेटौँडामा गरेको प्रदेश योजनाको आधारपत्र सार्वजनिकिकरण कार्यक्रममा बोल्दै उनले पुरानै कार्यशैलीले समृद्ध नेपालको सपना पुरा नहुने बताए । खल्तिबाट झिकेर ल्याईने योजनाले विकास सम्भव नरहेको भन्दै यसको अन्त्य आवश्यक रहेकोमा उनको जोड थियो । ‘खल्तिबाट योजना झिकेर टाईपिस्टलाई दिने शैली बदल्नु जरुरी छ, नयाँ समृद्धिको सपना पुरा हुँदैन ।’ व्यवस्थित विकास लागि प्रदेश सरकारले योजना बैंकको स्थापनाको काम अघि बढाउने उनले बताए । 

सुशासन कायम गर्नका लागि आफैंबाट शुरु गर्न पनि प्रदेश अन्तरगतका सबै निकायलाई मूख्यमन्त्री पौडेलले निर्देशन दिए । कार्यक्रममा प्रदेशका सभामुख सानुकुमार श्रेष्ठ, आर्थिक मामिला तथा योजनामन्त्री कैलाश ढुंगेल, प्रमुख प्रतिपक्षी दलका नेता ईन्द्रबहादुर बानियाँ, परामर्शदाता पिताम्बर शर्मा लगायतले आधारपत्रमा उल्लेख भए अनुसार आगामी दिनमा योजना कार्यान्वयनमा जोड दिए । 

नीति आयोगले प्रदेशका लागि तयार पारेको ५ बर्षे रणनीति योजनाको आधारपत्रका आधारमा मन्त्रालय र मातहका निकायले आवधिक योजना बनाउने आयोगका उपाध्यक्ष डा. खिमलाल देवकोटाले जानकारी दिए ।