राजधानीको टुंगो लगाउने बेला भएको छैन :  श्रेष्ठ

१३ पुस, हेटौँडा । प्रदेश नम्बर ३ का सभामुख सानुकुमार श्रेष्ठले प्रदेश राजधानी र नामाकरणको टुंगो लगाउने बेला भई नसकेको बताएका छन् । 
शुक्रबार प्रदेशसभा भवनमा भएको पत्रकार सम्मेलनमा उनले राजधानी र नामाकरणको विषय परिपक्व भईनसकेकोले अहिले टुंगो नलागएको बताए । उनले अदालतमा मुद्धा परेको र राजनैतिक सहमति नजुटेकाले राजधानीको विषय टुंगो लगाउन बाँकी रहेको बताए । राजधानीको विषय प्रदेशसभाको अधिकारको विषय भएको भन्दै उनले समय आएपछि यो विषयलाई प्रदेशसभाबाट टुंगो लगाउने दावि गरे । ‘आँप झारेर पनि खान सकिन्छ तर समय आएपछि आफैं झर्छ नि’–उनले भने–‘राजनैतिक दलबीच सहमति जुटाएर राजधानी र नामको टुंगो लगाउँदा उपयुक्त हुन्छ ।’ 
उनले बजेट बाहेक अहिलेसम्मका सबै विधेयक प्रदेशसभामा सर्वसम्मत ढंगले पारित भएको स्मरण गराउँदै उनले राजधानीको विषय पनि सहमतिकै आधारमा हुनुपर्नेमा जोड दिए । पत्रकार सम्मेलनमा उपसभामुख राधिका तामाङले नीतिगत रुपमै उपसभामुखहरुको भूमिकालाई कम गरिएको बताईन् । यसबारे सभामुख र उपसभामुखहरुको भेलामा समेत छलफल भएको उनले जानकारी दिईन् । 
पत्रकार सम्मेलनमा प्रदेश सभाले बर्षे अधिवेशन अवधिभर गरेको गतिविधिबारे जानकारी दिईएको थियो ।