रेडियो सन्देशले थाईल्याण्डमा सम्मान एवं सांस्कृतिक कार्यक्रम गर्ने

१५ पुस, हेटौँडा । हेटौँडामा रहेको सामुदायिक रेडियो रेडियो सन्देशले थाईल्याण्डमा पत्रकार सम्मान एवं सांस्कृतिक कार्यक्रम गर्ने भएको छ । 
रेडियो शुभारम्भ एवं निकास साप्ताहिकको १५ औं बार्षिकोत्सवको अवसरमा पत्रकार सम्मान एवं सांस्कृतिक कार्यक्रम गर्ने भएको हो । आगामी फागुन २३ गतेदेखि २७ गतेसम्म भ्रमणसहित सम्मानको कार्यक्रम राखेको रेडियोका अध्यक्ष एवं पत्रिकाका प्रकाशक सुनिल खड्काले जानकारी दिए । आइतबार हेटौँडामा पत्रकार सम्मेलन गरी खड्काले कार्यक्रमबारे जानकारी दिएका हुन् । 
रेडियो सन्देशमा विज्ञापन प्रसारण गर्ने विज्ञापनदातालाई फागुन २३ देखि २७ गतेसम्म थाईल्याण्डको बैंकक, पतैया आईल्याण्ड लगायतका ऐतिहासिक पर्यटकीय स्थलको निःशुल्क भ्रमण गराउने पत्रकार सम्मेलनमा जानकारी दिईएको थियो । आयोजक खड्का अनुसार सोही अवसरमा १४ बर्षदेखि प्रदान गर्दै आएको रामचन्द्र स्मृति सिर्जनसिल राष्ट्रिय पत्रकारिता पुरस्कार र सामाजिक व्यक्तित्वहरुलाई सम्मान गरिने छ ।
कार्यक्रममा नेपाल पत्रकार महासंघ प्रदेश ३ का अध्यक्ष प्रताप विष्ट, महासचिव कृष्ण सारु मगर, मकवानपुर अध्यक्ष हरि हुमागाई, प्रेस युनियन मकवानपुरका अध्यक्ष कुमार अधिकारी लगायतको उपस्थिति रहेको थियो ।