भुकम्प प्रभावितमा नपरेकाको अन्तिम पटक सर्वेक्षण शुरु

१८ पुस, हेटौँडा । भुकम्पमा घर क्षति भए पनि भकुम्प प्रभावित लाभग्राही सूचिमा नपरेकाहरुको अन्तिम पटक घर सर्वेक्षण शुरु भएको छ ।
भुकम्प पुर्ननिर्माण प्राधिकरण जिल्ला कार्यान्वयन इकाईले बुधबार हेटौँडामा गरेको पत्रकार सम्मेलनमा यस्तो जानकारी दिईएको हो । जिल्ला कार्यान्वयन इकाई अन्तरगतको भवन शाखाका इन्जिनियर रविन पाठकका अनुसार पटक पटक भएको घर सर्वेक्षणमा छुटेका भुकम्प प्रभावितका लागि अन्तिम पटक सर्वेक्षणको काम शुरु भएको छ । 
उनले प्रत्येक स्थानीय तहमा ३ जनाका दरले प्राविधिक खटाईएको बताए । यसका लागि तालिम प्रशिक्षण भईरहेको समेत पत्रकार सम्मेलनमा जानकारी दिए । उनले पछिल्लो समय आंशिक क्षतिमा परेका लाभग्राहीहरुको घर प्रवलिकरणको काम समेत अघि बढाएको जानकारी दिए । 
कार्यक्रममा भुकम्प पुर्ननिर्माण जिल्ला कार्यान्वयन ईकाई प्रमुख सोमराज तिमल्सिना, शिक्षा शाखा प्रमुख प्रेम केसी लगायतले पुर्ननिर्माणको पछिल्लो अवस्था, आईपरेका समस्या लगायतको बारेमा जानकारी दिएका थिए । नेपाल पत्रकार महासंघ प्रदेश नम्बर ३ का अध्यक्ष प्रताप विष्टको प्रमुख आतिथ्यता एवं मकवानपुर अध्यक्ष हरि हुमागाईको अध्यक्षतामा कार्यक्रम भएको थियो ।