तरुण दल सरकार विरुद्ध प्रदर्शनमा उत्रदै 

१० माघ, हेटौंडा । नेपाली काँग्रेसको भातृ संगठन नेपाल तरुण दलले आज ३ नम्बर प्रदेशको राजधानी हेटौंडामा सरकार विरुद्ध बिरोध प्रदर्शन गर्दै छ । 
केन्द्रिय कार्यक्रम अनुसार तरुण दलले आज सरकार बिरुद्ध ७ वटै प्रदेशको राजधानिमा बिरोध प्रदर्शन गर्न लागेको हो । 
तरुण दल मकवानपुरले मंगलबार नै हेटौँडामा पत्रकार सम्मेलनको आयोजना गरि बिरोध प्रदर्शनको तयारी पुरा भएको जनाएको थियो । 
तरुण दलले वर्तमान ओलि सरकारले अधिनायकवादी चरित्र प्रदर्शन गरेको भन्दै प्रदर्शन र कोणसभा गर्न लागेको हो ।
कम्युनिष्ट सरकारको अधिनायकवादी चरित्र, भ्रष्टाचार, महंगी, मुल्यबृद्धी, वाइडबडी खरिद अनियमितता, निर्मला पन्तको हत्या लगायतका गैरकानुनी र अलोकतान्त्रिक गतिविधिको विरोधमा सातै प्रदेशको राजधानीमा विरोध प्रदर्शन कार्यक्रमको आयोजना गर्न लागिएको नेपाल तरुण दल मकवानपुरका अध्यक्ष इश्वर पाठकले बताए ।
विरोध प्रदर्शनमा तरुण दलका केन्द्रीय अध्यक्ष जीतजंग बस्नेत, उपाध्यक्ष उत्तम चापागाईं, महासचिव भुपेन्द्र जंग शाही, कोषाध्यक्ष विद्धान गुरुङलगायत पार्टीका केन्द्रीय तथा जिल्ला नेताहरुको सहभागिता हुने बताइएको छ ।
विरोध जुलुस आज दिउँसो १२ बजे पार्टी कार्यालय हेटौंडा–२ बाट सुरु भई काँग्रेसचोक, उद्योगवाणिज्य संघ चोक, वुद्धचोक, चौघडा टेम्पो पार्क चोक, स्कुलरोड हुँदै बुद्ध चोकमा पुगेर कोण सभामा परिणत हुने अध्यक्ष पाठकले बताए ।