भौगोलिक संवेदनशिलतालाई ध्यान दिएर विकास गर्नु जरुरी : भण्डारी

१० माघ, हेटौँडा । राष्ट्रपति विद्यादेवी भण्डारीले नेपालको भौगोलिक संवेदनशिलतालाई ध्यानमा दिएर विकास गर्नुपर्नेमा जोड दिएकी छिन् ।
मकवानपुरको मकवानपुरगढी दरबारमा विहिबार आयोजित २५६ औं विजय उत्सव समारोहमा बोल्दै उनले विकास निर्माणको काम गर्दा भौगोलिक संवेदनशिलतालाई विचार गर्नुपर्नेमा जोड दिएकी हुन् । दिगो विकासका लागि त्यही अनुसारको प्रविधि र सिपको प्रयोग गर्नुपर्ने राष्ट्रपति भण्डारीको भनाई थियो । 
उनले कृषिको आधुनिकिकरण र यान्त्रिकिकरण गर्दै देशमा रोजगार सिर्जना गर्न सकिने भएकाले त्यसतर्फ लाग्न पनि आग्रह गरिन् । नेपालको राष्ट्रिय अखण्डतामा मकवानपुरगढीको ऐतहासिक महत्व रहेको भन्दै यसको संरक्षण र विकासमा राज्यको योगदान आवश्यक रहेको उनको भनाई थियो । 
कार्यक्रममा भण्डारीले मकवानपुर गढीमा झण्डोतोलन गर्नुका साथै नेपालको नक्सा अंकित स्मारकको अनावरण गरेकी थिईन् । कार्यक्रममा राष्ट्रपति भण्डारीले मकवानपुरगढीको संरक्षणमा योगदान पुर्याउनु हुने केदार न्यौपाने, बद्री खतिवडालाई सम्मान गर्नुका साथै हाफ म्याथन दौडका विजेता खेलाडिलाई पुरस्कार प्रदान गरेकी थिईन् ।
कार्यक्रममा मूख्यमन्त्री डोरमणी पौडेल, जिल्ला समन्वय समिति मकवानपुरका प्रमुख रघुनाथ खुलाल, मकवानपुरगढी गाउँपालिकाका अध्यक्ष विदुर हुमागाई र वडा नम्बर २ का अध्यक्ष बखानसिं पाख्रिनले मन्तव्य व्यक्त गरेका थिए ।