ओली नेतृत्वको सरकार सबैभन्दा भ्रष्ट : सिंह

१६ माघ, हेटौँडा । नेपाली कांग्रेसका नेता प्रकाशमान सिंहले केपि शर्मा ओली नेतृत्वको वर्तमान सरकार सबैभन्दा भ्रष्ट भएको बताएका छन् । 
भ्रष्टाचारमुक्त देश बनाउने बाचासहित प्रधानमन्त्री भएका ओली नेतृत्वको सरकार सबैभन्दा बढि भ्रष्टाचारमा फसेको उनको भनाई थियो । नेपाली कांग्रेस पार्टी कार्यालय मकवानपुरमा बुधबार भएको कार्यकर्ता भेटघाटपछिको पत्रकार सम्मेलनमा नेता सिंहले वाईड बढि विमान खरिद प्रकरणमा सार्वजनिक लेखा समितिले भ्रष्टाचार गरेको प्रतिवेदन दिंदा समेत कारवाहीमा उदासिनता देखाएको बताए । 
उनले भ्रष्टाचारमा दोषि देखिएका मन्त्री रविन्द्र अधिकारीलाई जोगाउन खोजेर वर्तमान सरकारले आप्mनो भ्रष्ट्रचारी चरित्र सार्वजनिक गरेको बताए । कांग्रेस सभापति शेरबहादुर देउवाको नाम समेत मुछिएको छ नि भन्ने पत्रकारहरुको जिज्ञासामा सभापति स्वयंले संसदमा भ्रष्टाचारको छानविन गर्न माग गरेको बताए । उनले दुई तिहाईको सरकार हरेक क्षेत्रमा असफल भएको समेत बताए । 
उनले सरकार कुटनैतिक क्षेत्र, परराष्ट्र नीति, सुशासन, विकास सबै क्षेत्रमा पूर्ण रुपमा असफल भएको दावि गरे । तीन तहको सरकार संचालनको लागि आवश्यक कानून निर्माणमा वेवास्ता गरेर सरकारले संघीयता कार्यान्वयनमा उदासिनता देखाएको समेत उनको आरोप छ । उहाँले गलत कार्यशैलीकै कारण दुई तिहाई प्राप्त ओली नेतृत्वको सरकार जनताबाट तिरस्कृत हुन थालेको बताए । 
पत्रकार सम्मेलनमा कार्यवाहक सभापति विष्णुप्रसाद लामिछाने, निवर्तमान सभापति रघुरमण न्यौपाने, पूर्व सभापति माइकल रामचन्द्र अर्याल, पार्टी सचिव बुद्ध लामा, आनन्द कठायत, सहसचिव रामबाबु बानियाँ, पार्टी प्रवक्ता प्रदिप कोइराला लगायतको उपस्थिति रहेको थियो ।