प्रदेश राजधानी : बानियाँले भने–हेटौँडा नै हुन्छ, मूख्यमन्त्रीले कुरा चपाए

२९ माघ, हेटौँडा । प्रदेश नम्बर ३ को राजधानी बारेमा धेरैको चासो रहेको छ । प्रदेश सभाको एक बर्षको अवसरमा मंगलबार आयोजित कार्यक्रममा प्रमुख प्रतिपक्ष दल नेपाली कांग्रेसका नेता ईन्द्रबहादुर बानियाँले अब राजधानी हेटौँडा नै हुने बताए पनि मूख्यमन्त्री डोरमणी पौडेलले भने कुरा चपाएका छन् ।
आफ्नो भाषणका क्रममा नेता बानियाँले हेटौँडा प्रदेशको राजधानी रहनेमा आफु ढक्क रहेको बताए । धेरै कुराले प्रदेशको राजधानी हेटौँडा नै हुने उनको दावि थियो । ‘रणनीतिक रुपमा र सडक सञ्जाल, रोजगारी, पूर्वाधार लगायतका हिसावले पनि अब राजधानी हेटौँडाबाट सर्दैन भन्नेमा म पूर्ण रुपमा विश्वस छु ।’–उनले थपे–‘मूख्यमन्त्री पनि विश्वस्त हुनुहुन्छ, सरकार पनि छ, बरु धेरै ढिलो नगरेर मूख्यमन्त्रीले आफ्नो दलबाट स्थायी राजधानीको टुंगो लगाए हेटौँडा हुनेमा द्विविधा छैन ।’ उनले अस्थिर मानसिकताबाट स्थिर मानसिकतामा लैजानका लागि पनि राजधानी टुंगो लगाउनुपर्नेमा जोड दिए ।
तर त्यस लगतै बोलेका मूख्यमन्त्री डोरमणी पौडेलले भने कुरा चपाएर आफ्नो मन्तव्य राखेका थिए । उनले राजनैतिक दलको नेतृत्व तहमा सहमति जुट्ने वितिकै राजधानीको टुंगो लाग्ने बताए पनि स्थान भने इंगित गर्न चाहेनन् । राजधानीको विषयले अस्थिर मनस्थिति रहेको बताउँदै उनले केही समस्या रहेको समेत सुनाए । उनले सहमतिका आधारमा मात्रै राजधानी सार्न सजिलो र सहज हुने बताए । ‘पार्टीको नेतृत्व तहमा सहमति गर्ने प्रयत्न भईरहको छ र त्यो सहमति भएको भोलीपल्ट हामी राजधानीको बारेमा टुंगो लगाउँछौं ।’ एउटा सहमति भए प्रक्रियामा जान सहज हुने बताउँदै उनले अब धेरै समय कुर्नु नपर्नेमा विश्वस्त हुन आग्रह गरे ।