'हेटौंडा गट ट्यालेन्ट'मा ४७ जना सहभागी हुने

२९ कार्तिक, हेटौंडा । हेटौंडामा यही मङ्सिर २ गतेदेखि १३ गतेसम्म आयोजना हुन लागेको राष्ट्रिय खेलकुद तथा व्यापार महोत्सव–२०७३ मा हुन लागेको हेटौंडा गट ट्यालेन्टमा ४७ जना सहभाागी हुने भएका छन् । प्रतिष्पर्धामा गायनतर्फ ३० र नृत्य तर्फ १७ जनाले सहभागिता जनाउने भएका हुन् ।

कार्यक्रम संयोजक विशाल घोषका अनुसार नामावली दर्ता गराउने अन्तिम दिन सोमबार सम्ममा गायन र नृत्य गरी ४१ जनाले सहभागिताको लागि नाम टिपाएका हुन् । नाम दर्ता गराएका मध्ये गायन तर्फको पहिलो चरणको छनौट कार्तिक ३० गते मङ्गलबार र नृत्य तर्फको छनौट मंसिर १ गते बुधबार हुनेछ ।

‘हामीले पेण्टिङको पनि प्रतिस्पर्धा गराउने भनेका थियौं, २ जनाले मात्र नाम दर्ता गराएका छन्’, संयोजक घोषले भने, ‘उनीहरु २ जनालाई कुनै एउटा बिषयमा चित्र बनाउन दिनेछौं र उनीहरुको चित्र प्रतिष्ठानमा राख्नेछौँ ।’ पहिलो चरणको छनौटबाट गायन तर्फ १५ र नृत्य तर्फ १० जनाको छानिने छन् ।

त्यसपश्चात दुवै विधाका प्रतियोगीलाई ६० प्रतिशत निर्णायकको निर्णयको आधारमा, बाँकी ४० प्रतिशतमा फेसबुक लाइक र टिकट भोटिङको आधारमा छनौट गरिने बताइएको छ । दुवै विधाको छनौट एक/एक दिन बिराएर गरिने आयोजकको तयारी रहेको छ । गायन र नृत्य दुवै बिधाको उत्कृष्ट एक/एक जना मध्ये पनि सर्वोत्कृष्ट हुन सफल एकजनालाई हेटौंडा गट ट्यालेन्टको उपाधी दिइने संयोजक घोषले जानकारी दिए ।

ट्यालेन्टले नगद ३० हजारसहित विभिन्न आकर्षक पुरस्कार प्राप्त गर्नेछ भने इक्ल्याट एजुकेसन लिंक्सले आइएल्ट्स कोर्षमा ५० प्रतिशत छुट दिनेछ । ‘आफूसंग भएको कलालाई उत्कृष्ट रुपमा प्रस्तुत गर्नेले हेटौंडा गट ट्यालेन्ट जित्नेछ’, संयोजक विशाल घोषले भने, ‘यो गायन वा नृत्य जुनसुकै क्षेत्रको प्रतिभा पनि हुन सक्छ ।’